Bakıda BMT Sivilizasiyalar Alyansının VII  Qlobal Forumu öz işinə başlayıb. Görkəmli ictimai-siyasi xadimlər, ziyalılar, ekspertlər belə bir mötəbər tədbirin Azərbaycanda keçirilməsinin ölkəmizə olan inam və etimaddan irəli gəldiyini bildirirlər.

Milli Məclisin deputatı, professor Musa Qasımlı da bizimlə fikrini bölüşərkən bu forumun respublikamızda keçirilməsini yüksək dəyərləndirdi. Dedi ki, 2014-cü il sentyabrın 26-da BMT Baş Məclisinin 69-cu sessiyası çərçivəsində BMT-nin Sivilizasiyalar Alyansı Dostlar Qrupunun Nazirlər Toplantısında Sivilizasiyalar Alyansının VII Qlobal Forumunun 2016-cı ildə Bakıda keçirilməsi barədə qərar qəbul edilib.

Professor qeyd etdi ki, BMT-nin Sivilizasiyalar Alyansının VII  Qlobal Forumunun Azərbaycanda keçirilməsi dövlətimizin beynəlxalq nüfuzunun və mövqelərinin güclənməsinin məntiqi nəticəsidir: “Dünyanın müxtəlif  guşələrindən dövlət, siyasət, ictimai xadimlərinin ölkəmizə gəlməsi Azərbaycana, möhtərəm Prezidentimiz İlham Əliyevə olan inam və etimadın bir nümunəsidir. Bu forum bir daha göstərir ki, Azərbaycan müxtəlif sivilizasiyaları qovuşduran  ölkədir. Bu strategiya artıq dövlətimizin çoxyönlü siyasətinin qanadlarından birinə çevrilmişdir. Forumda dünyanın tanınmış simalarının  öz mülahizələrini söyləməsi yüksək dəyərlərə malikdir”

M.Qasımlının fikrincə, forumda Azərbaycan Prezidenti İlham Əliyevin nitqi qlobal  problemləri həll etmək baxımından çox əhəmiyyətlidir. Bu forum bir daha göstərir ki, Azərbaycan regionun lider dövləti kimi dünya siyasətinə mühüm töhfələr verir.

Milli Məclis deputatının qənətinə görə, Bakı  qlobal sülh və təhlükəsizliyə xidmət edən beynəlxalq tədbirlər keçirən diplomatik paytaxta çevrilib.

Söhbəti qələmə aldı:
Əliqismət BƏDƏLOV,
“Xalq qəzeti”