Birinci Avropa Oyunlarına qatılan idmançılar yarışların təşkilindən və onlara yaradılan şəraitdən  çox razılıq edirlər. İlk Avropa  Oyunlarının yüksək səviyyədə keçirildiyini bildirən italiyalı gimnast Tommas de Vecchis dedi ki, özümü sanki Olimpiya Oyunlarında olduğu kimi hiss edirəm. Onun sözlərinə görə, yarışlar çox gərgin mübarizə şəraitində keçir.

İtaliyalı idmançı Azərbaycanda birinci dəfə olduğunu dedi: “Bakı çox xoşuma gəlir. İçərişəhərdə gördüklərimi  xüsusi qeyd etmək istərdim. Buranı gəzdikcə və Bakının qədimliyini əks etdirən eksponatları gördükcə şəhərinizin çox uzun bir tarixə malik olduğunu duyuram. Buradakı mağazalarda satılan müxtəlif fiqurlar və əşyalar xalqınızın milliliyini və adət-ənənələrini əks etdirir. İdmançı olsam da, belə eksponatlarla ciddi maraqlanıram. Görürsünüzmü, Azərbaycanın qədimliyini, adət-ənənələrini əks etdirən çoxlu suvenir almışam. Bunları özümlə İtaliyaya aparacağam”.

Yarışların təşkili ilə əlaqədar  sualımızı cavablandıran italiyalı gimnast dedi: “Mən Avropa Oyunlarını Olimpiya Oyunlarına bənzədirəm. Çünki burada idmanın iyirmiyə yaxın növü üzrə yarışlar keçirilir. Ona görə də çox məsuliyyətli və çətindir. Bu yarışda qalib olmaq çox şərəflidir. İdmançılara yaradılan şəraitə gəlincə isə, deməliyəm ki, hər şey yüksək səviyyədədir. Bundan sonra Azərbaycanda keçirilən bütün beynəlxalq turnirlərdə həvəslə iştirak edərdim”.

Söhbəti qələmə aldı:
Əliqismət BƏDƏLOV,
Rafiq SALMANOV (foto),
“Xalq qəzeti”