Azərbaycan idmançıları I Avropa Oyunları çərçivəsində keçirilən müxtəlif idman növləri üzrə yarışlarda layiqincə çıxış edirlər. Onların uğurları ölkəmizin idman mütəxəssisləri tərəfindən də yüksək qiymətləndirilir. Azərbaycan Milli Məclisinin deputatı, Milli Olimpiya Komitəsinin baş katibi,  Azərbaycan Boks Federasiyasının vitse-prezidenti Ağacan Əbiyev də onların uğurları haqqında fikirlərini bildirdi:

–  Hər birimiz qürur duyuruq ki,  İlk Avropa Oyunları kimi nüfuzlu idman yarışına ilk olaraq, məhz Azərbaycan ev sahibliyi edir.  İlk Avropa Oyunlarında iştirak edən yüksək səviyyəli qonaqlar, nüfuzlu idman ictimaiyyətinin nümayəndələri ilə çox ünsiyyətdə oluruq. Onlarla söhbətdə hamı Bakı Olimpiya Stadionunda  gerçəkləşən I Avropa Oyunlarının açılış mərasiminin yüksək səviyyədə təşkilindən danışır, “Bu, fantastik hadisə idi”-deyə heyranlıqlarını ifadə edirlər. Artıq on gündür ki, yarışlar davam edir. Azərbaycan idmançıları müxtəlif idman növlərində yüksək səviyyədə çıxış edir, qazandıqları qızıl, gümüş, bürünc medallarla təkcə idman ictimaiyyətini deyil, Azərbaycan xalqını sevindirirlər. Azərbaycanın ilk Avropa Oyunlarına yüksək səviyyədə hazırlığı, bir çox yeni idman arenalarının tikilməsi və s.  ölkəmizin idmana olan qayğısından, gənclərimizin sağlam həyat tərzinə təşviqindən  irəli gəlir. Təsadüfi deyil ki, Avropa Olimpiya Komitəsinin prezidenti Patrik Hikki Masallı Olimpiya Kompleksinin açılışında çıxış edərkən bildirmişdi ki, artıq Azərbaycan Avropanın Olimpiya mərkəzinə çevrilir. Hesab edirəm ki, ölkəmiz nəinki, Avropanın artıq dünyanın Olimpiya mərkəzinə çevrilməkdədir. Avropa qitəsini əhatə edən ilk mötəbər idman yarışının yüksək səviyyədə təşkili, dünyanın nüfuzlu atletlərinin çıxışları, nüfuzlu televiziya və media təşkilatlarının Avropa Oyunlarını yüksək səviyyədə işıqlandırması, Oyunların açılış mərasimi barədə müsbət təəssüratlar görülən işlərin bəhrəsidir. Cənab Prezident İlham Əliyevin, “Bakı-2015" Avropa Oyunları Təşkilat Komitəsinin rəhbəri Mehriban xanım Əliyevanın  fəaliyyəti bütün avropalı qonaqların diqqətini cəlb etmişdir. Onların rəhbərliyi ilə həyata keçirilmiş yüksək hazırlıq işləri hamı tərəfindən rəğbət və məhəbbətlə qarşılanmışdır.

Bəzi bədxah qüvvələr görülən bu böyük işlərə kölgə salmağa çalışsa da, bu Oyunların gedişinə heç bir təsir göstərmədi. Avropa Oyunlarının möhtəşəm açılış mərasimi bir daha dünyaya sübut etdi ki, Azərbaycan öz üzərinə götürdüyü öhdəliyi layiqincə yerinə yetirməyə qadirdir, Avropada, bütövlükdə dünyada sülh və  əmin-amanlıq işinə hər cür töhfə verməyə hazırdır.

I Avropa Oyunları ölkəmizə gələn atlet və turistlərə Azərbaycanın zəngin mədəni irsi, incəsənəti, tarixi məkanları ilə tanış olmağa imkan yaradır. Bu baxımdan Azərbaycanın beynəlxalq aləmdə zəngin mədəni irsə malik ölkə kimi tanıdılmasında I Avropa Oyunlarının rolu əvəzsizdir.

Söhbəti qələmə aldı:
Əfsanə BAYRAMQIZI,
“Xalq qəzeti”