Müsahibimiz Türkdilli Ölkələrin Parlament Assambleyasının (TÜRKPA) baş katibi Jandos Asanovdur

– Cənab Baş katib, Avropa Olimpiya Komitəsi ilk Avropa Oyunlarının Azərbaycanda keçirilməsi barədə qərar qəbul edəndə bu möhtəşəm idman tədbirinin başlanmasına az vaxt qalırdı. Bu müddət ərzində həyata keçirilən hazırlıq işlərini necə dəyərləndirirsiniz?

– 2012-ci ilin sonunda Avropa Olimpiya Komitəsinin birinci Avropa Oyunlarının Bakıda keçirilməsi ilə bağlı verdiyi qərardan sonra Azərbaycanda tez bir zamanda müvafiq hazırlıq işlərinə başlanılmışdır. Bu gün də davam edən Dağlıq Qarabağ münaqişəsinin yükü və bundan irəli gələn böyük problemlərin mövcud olduğu bir zamanda, vaxt məhdudiyyətinə baxmayaraq, ölkə rəhbərliyi və Təşkilat Komitəsi son dərəcə çətin vəzifəni uğurla yerinə yetirdi. Azərbaycanın dinamik sosial-iqtisadi inkişafı respublikanın həm də idman  ölkəsinə çevirmişdir. Birinci Avropa Oyunlarının, müasirliklə zəngin mədəni irsi bir araya gətirən bu möhtəşəm tədbirin Bakıda keçirilməsi heç də təsadüfi deyil, bu, ən düzgün seçimdir. Yeni tikilmiş binalar - saray, mehmanxana və idman obyektləri müasir Azərbaycanın şövq və ideyalarını təcəssüm etdirir. Azərbaycan heç bir mədəni və dini ayrı-seçkilik yükü altında qalmamaqla öz zəngin tarixi irsini ehtiramla qoruyaraq cəsarətlə gələcəyə baxır. Ona görə də Avropa Oyunları xoşməramlı dünyagörüşün göstərilməsi kimi qiymətləndirilməlidir.

– İlk Avropa Oyunlarının Azərbaycanda keçirilməsinin əhəmiyyətini necə qiymətləndirirsiniz? Belə mötəbər idman tədbirlərinə ev sahibliyi edən  ölkənin qazancı nə olur?

– Mən bu suala Azərbaycan Prezidenti cənab İlham Əliyevin beynəlxalq tədbirdə səsləndirdiyi fikirlə cavab vermək istərdim. 2015-ci ilin mayında  Bakıda keçirilən Üçüncü Ümumdünya Mədəniyyətlərarası Dialoq  Forumunun açılışında cənab Prezident İlham Əliyev demişdir: “Bu Oyunların təşkil edilməsi böyük çağırış idi, lakin Avropa Olimpiya Komitəsinin dünyada ilk Avropa Oyunlarının Azərbaycanda keçirilməsi ilə bağlı qərarı son illər qəbul edilmiş ən müdrik qərarlarından biridir. Biz 6 mindən çox Avropa idmançısını bir araya gətirəcəyik. Bu, yalnız böyük idman tədbiri deyil, həm də dostluq və tərəfdaşlıq tədbiri olacaq və qonaqpərvərliyimizi nümayiş etdirmək baxımından yaxşı fürsət olacaq”.

İdman aləmində bu cür qlobal hadisələrin baş verməsi əsasən ev sahibi olan ölkənin infrastrukturunun inkişafına birbaşa töhfədir. Azərbaycanda Oyunlara hazırlıq mərhələsində bir sıra idman obyektlərinin və eyni zamanda, nəqliyyat infrastrukturunun inşasına başlanılmış və bu işlər artıq uğurla başa çatmışdır. Həmçinin, sağlam həyat tərzi, gəncliyin inkişafı, maarifləndirilməsi istiqamətində kütləvi təbliğat və davamlı inkişafın nəticəsi olaraq qazanılan nailiyyətlərin gələcək nəsillərə ötürülməsinə dair təşviqat fəaliyyəti də böyük əhəmiyyət kəsb edir. Azərbaycan bu cür təşəbbüsləri davam etdirmək niyyətindədir. Belə ki, ölkədə 2017-ci ildə İslam Həmrəyliyi Oyunları, 2020-ci ildə isə Avropa Futbol Çempionatının keçirilməsi planlaşdırılır. Bütün bunlar Azərbaycanın beynəlxalq aləmdə ki, nüfüzunun artması deməkdir.

Müsahibəni qələmə aldı:
Əliqismət BƏDƏLOV,
“Xalq qəzeti”