Bakıda Avropa Oyunlarının başlamasını idmançılarımız, təbii ki, böyük həyəcanla gözləyirlər. Azərbaycanın qədim və sevilən idman növü olan güləş ustalarının oyunlardan gözləntiləri daha çoxdur. Həmsöhbətimiz Güləş Federasiyasının baş katibi Əjdər Cəfərovdur.

– Güləş Federasiyası Bakı Avropa Oyunlarına necə hazırlaşır?

– Bizim üçün çox qürurlandırıcı məqam odur ki, bu tarixi səhifə məhz Azərbaycanda yazılacaq. Prezident İlham Əliyevin rəhbərliyi ilə ölkəmiz son illər başqa sahələrdə olduğu kimi, idmanda da böyük layihələrə imza atır. İlk dəfə keçiriləcək Avropa Oyunları da ölkəmizə, onun liderinə olan inam və rəğbəti təcəssüm etdirir. 

Avropa Oyunlarında təmsil olunacaq 20 idman növündən biri də güləşdir. Və deyərdim ki, idmansevərlərin daha çox medal gözlədikləri növ də elə güləşdir. İlk Avropa Oyunlarının  ölkəmizdə keçirilməsi məlum olandan sonra Azərbaycan Güləş Federasiyasının prezidenti  Fazil Məmmədov və birinci I vitse-prezidenti Namiq Əliyevinin rəhbərliyi ilə güləşçilərimizin hazırlıqlarına start verilib. Hazırda intensiv hazırlıqlar davam etdirilir.

– Ən çox medal ümidlərimiz olan idmançılar kimlərdir?

– Ümumilikdə, 24 güləşçimiz ilk Avropa Oyunlarının medalları uğrunda mübarizə aparacaq. Adları hələ açıqlamaq tezdir, ancaq deyə bilərəm ki, bütün titullu güləşçilərimizin bu mötəbər idman yarışında iştirakı planlaşdırılır.

– Azərbaycanlı hakimlər güləş yarışlarının idarə edilməsinə cəlb olunubmu?

– Azərbaycan Güləş Federasiyası ölkəmizdə hakimlik institutunun təkmilləşdirilməsi istiqamətində davamlı işlər görür. Bunun nəticəsidir ki, bu gün ölkəmizdə güləş idman növü üzrə 20-dən artıq beynəlxalq dərəcəli hakim var. Onlardan yalnız ikisi super kateqoriyalı hakimlər Hicran Şərifov və İntiqam Alıyev güləş yarışlarında Azərbaycanı təmsil edəcəklər.

Aida AYSA,
“Xalq qəzeti”