Afina Olimpiadasının bürünc mükafatçısı, güllə atıcılığı üzrə yığma komandanın baş məşqçisi İradə Aşumova ilə məşq meydançasında görüşdük.

Avropa Oyunlarına qızğın hazırlıq gedirdi. Xanım snayper Oyunlarla bağlı gərgin məşqlərin keçirildiyini, güllə atıcılarının hər birinin yarışlarda medal qazanmağa iddialı olduğunu dedi: - “Ölkəmizdə qitənin ilk oyunlarının keçirilməsi bizi sevindirməklə yanaşı, üzərimizə böyük məsuliyyət qoyur. Atıcılığın ölkəmizdə qədim ənənələri var və bu növdə yüksək nailiyyətlər əldə etmişik. Oyunlarda yığmamızın üzvləri Ruslan Lunyov 10, 25, Rəsul Məmmədov 10, Nərminə Səmədova 10 metr məsafələrdəki hədəfləri dəqiq hədəfə almağa çalışacaqlar. Mən isə 10 və 25 metr məsafələr üzrə qüvvəmi sınayacağam.  Bu bizim üçün böyük sınaqdır. İdmana dövlət tərəfindən göstərilən diqqət və qayğıya cavab olaraq biz idmançılar da yüksək nəticələr əldə etməliyik. Avropada ən böyük atıcılıq komplekslərindən biri hesab edilən Atıcılıq Mərkəzi idmançılarımızın istifadəsindədir və ilk dəfə olaraq idmanın güllə və stend atıcılığı növləri üzrə yarışların keçirilməsi üçün meydançalar bir kompleksdə birləşib. İdmançılarımız üçün yaradılan şərait dünyaya nümunə olduğu kimi, biz də nəticələrimizlə digər ölkələrin təmsilçilərinə nümunə olmalıyıq. Bütün sahələrdə əldə edilən sürətli inkişaf Azərbaycanın beynəlxalq aləmdə nüfuzunu xeyli artırıb. Azərbaycan dünyanın aparıcı idman dövlətlərindən biri hesab olunur. Sevindiricidir ki, ən mötəbər turnirlərdə belə Azərbaycan idmançılarını ciddi rəqib hesab edirlər”.

İradə xanım onu da qeyd etdi ki, idmançıların ən böyük arzusu oyunlarda medal qazanmaqdır: “Bu oyunlar bizim üçün çox qiymətlidir. Bir tərəfdən, Avropanın ilk oyunlarıdır, digər tərəfdən bu möhtəşəm oyunlara doğma Azərbaycan ev sahibliyi edir. Bütün qüvvəmizlə oyunlarda medal qazanmağa çalışacağıq.  Xalqımız bizdən yüksək nailiyyətlər gözləyir”.

“Xalq qəzeti”