- “Xalq qəzeti”nin mənə yaratdığı imkandan istifadə edərək, ilk növbədə, idman ictimaiyyətimizi, bütün xalqımızı Dünya Azərbaycanlılarının Həmrəyliyi Günü və Yeni il münasibətilə ürəkdən təbrik edir, hamıya ən xoş arzularımı bildirirəm.

Həmrəyliyin, möhkəm birliyin nə qədər böyük qüvvə olduğunu artıq arxada qalan bir ildə bizim “Qarabağ” kollektivimiz daha aydın, daha dərindən dərk etdi. Avroliqa oyunlarında bütün ölkənin komandamızı çox böyük fəallıqla dəstəklədiyini görəndə ürəyimiz dağa dönürdü. Futbolçularımız da ümidləri doğrultmaq üçün əllərindən gələni etdilər, qrup mərhələsinə çıxdılar, burada qələbə qazanan ilk Azərbaycan komandası kimi tarixə düşdülər. Hətta biz pley-off mərhələsinə də çıxıb daha bir tarixi səhifə yaza bilərdik. Ancaq hakimlərin ədalətsizliyi komandamızı və onun pərəstişkarlarını böyük sevincdən məhrum etdi.

Əgər 2014-cü il milli çempionatımızın qızıl medalları, indiki birincilikdə qış fasiləsinə lider mövqeyində çıxmağımız, Avropa stadionlarında inamlı oyunumuzla yadda qalacaqsa, bizim üçün ilin ən mühüm hadisəsi Azərbaycan Prezidenti cənab İlham Əliyevin qəbulunda olmağımız, onunla görüşmək imkanı oldu. Ölkədə idmanın inkişafına yorulmadan öz töhfələrini verən, idmançılarımıza hərtərəfli köməyini bir an belə əsirgəməyən möhtərəm dövlət başçımızın komandamızın üzvlərini qəbul etməsi, Avroliqada çıxışlarımızı yüksək qiymətləndirməsi bizə sanki qol-qanad, əlavə güc vermişdir. Cənab Prezidentin qayğı və diqqətinə cavab olaraq yeni ildə Azərbaycan çempionatında liderlik mövqeyimizi daha da möhkəmləndirib finişdə ardıcıl ikinci il çempionluğu bayram etməyə, beynəlxalq meydanda builkindən də yaxşı nəticə göstərməyə, daha uzağa getməyə can atacağıq. Cənab İlham Əliyevin bizimlə görüşü gələcək işlərimiz üçün faydalı oldu. Prezidentin Azərbaycan idmanına, futbolumuza diqqət və qayğısı məsuliyyətimizi daha da artırır. Bunu biz özümüzə borc bilirik ki, işimizi daha yaxşı qurub, xalqımızı daha böyük uğurlarla sevindirək.

Qarşıdakı 2015-ci il idmançılarımız, bütün xalqımız üçün adi bir il olmayacaq. Tarixdə ilk dəfə keçiriləcək Avropa Oyunları gündən-günə yaxınlaşır. İnanıram ki, müxtəlif sahələr üzrə mötəbər tədbirlərin keçirilməsində böyük təcrübə əldə etmiş və onların yüksək səviyyədə təşkili ilə haqlı olaraq beynəlxalq aləmdə hamının rəğbətini qazanmış Azərbaycan birinci Avropa Oyunlarını da layiqincə keçirib əsl idman dövləti kimi bütün dünyada onsuz da yüksək olan nüfuzunu daha da artıracaqdır.

Bayramlarınız mübarək, əziz dostlar!

Qurban QURBANOV,

Azərbaycan çempionu,

Ağdamın “Qarabağ” komandasının baş məşqçisi