Oktyabrın 28-dən 30-dək Bakıda keçirilən Birinci Qlobal Gənclər Forumunda iştirak edən tanınmış əcnəbi nümayəndələrin bu möhtəşəm tədbir haqqında fikirləri maraq doğurur.

Avropa Şurasının eksperti, Cənubi Uels Universitetinin professoru  Hovard Vilyamson dedi:

– Qlobal Gənclər Forumunun təşkili mühüm məsələlərin müzakirəsinə hesablanmışdır. Burada dünya gənclərinin gələcək taleyi,  onları düşündürən məsələlər, problemlər və gələcək perspektivlər müzakirə obyektidir.  Bakıda bu forum çox yüksək səviyyədə təşkil olunub. Azərbaycan bu cəhətdən digər dünya ölkələrinə nümunə ola bilər.

Bakıda keçirilən bu forumun gedişindən məmnun qaldım. Ümid edirəm, qaldırılan və müzakirə olunan problemlər tezliklə öz həllini tapacaq. Bu cür forumların keçirilməsi gənclərin  fəaliyyətinin  təkmilləşdirilməsi baxımından da məqsədəuyğundur.

Afrikanın Gənclər Siyasəti üzrə Araşdırmalar Mərkəzinin nümayəndəsi Lorens Ndambuki Muli:

 –  Gənclərin daha çox yaradıcı işlərə cəlb olunmalarının təşviqi, onların ictimai-siyasi fəallıqlarının artırılması istiqamətində müxtəlif proqramların həyata keçirilməsinin zəruriliyi baxımından Bakı Forumu çox əhəmiyyətlidir. Zənnimcə, Azərbaycanın bu sahədəki təcrübəsindən digər ölkələr də bəhrələnməlidir. Azərbaycan dövlətinin mükəmməl gənclər siyasəti var.  Azərbaycan gəncliyi ictimai həyatın bütün sahələrində fəal iştirakı ilə seçilir. Bunun şahidi olmaq bizim üçün də xoşdur. İstərdik ki, Afrikanın bütün ölkələrində gələcəkdə eyni vəziyyəti müşahidə edək.

Anar TURAN,

“Xalq qəzeti”