Bu sözləri Azərbaycanda keçirilən IV Bakı Beynəlxalq Humanitar Forumunun iştirakçısı Xorvatiyanın keçmiş Prezidenti Stepan Mesiç “Xalq qəzeti”nin sualını cavablandırarkən  bildirdi. O dedi:

– Ölkənizdə gedən inkişaf məni çox sevindirdi. Xalqlar arasında etimadın bərpasının əhəmiyyəti məsələsindən bu gün öz çıxışımda bəhs etdim. Məncə, Azərbaycan və Xorvatiya xalqları arasında geniş əməkdaşlıq və səmərəli dialoq mövcuddur. Ölkələrimiz arasında böyük hörmətə əsaslanan dostluq münasibətləri var. Hər iki xalq müstəqilliyini bərpa etmək üçün xeyli əziyyət çəkmişdir.

Humanitar Forumu keçirməklə dövlətiniz bizə yüksək etimad göstərdi. Bu da, şübhəsiz ki, Azərbaycan xalqının qonaqpərvərliyindən irəli gəlir. 

 Forumdakı çıxışımda həmçinin qeyd etdim ki, mən bütün mübahisəli məsələlərin danışıqlar yolu ilə həllinə tərəfdaram. Biz çalışmalıyıq ki, dünyada sülhün carçısı qismində çıxış edək. Ümid edirəm ki, uzun illərdən bəri həllini tapmayan Ermənistan-Azərbaycan, Dağlıq Qarabağ münaqişəsi də tezliklə danışıqlar yolu ilə yekunlaşacaq. Belə mötəbər tədbirlərin keçirilməsi də məhz bu baxımdan vacibdir. İnanıram ki, ölkələrimiz arasında gələcəkdə də yüksək əməkdaşlıq və mehriban münasibət davam edəcək.

Təqdim etdi:

Anar TURAN, “Xalq qəzeti”