IV Bakı Beynəlxalq Humanitar Forumuna dünyanın 60 ölkəsindən 500 nəfərədək nümayəndə qatılmışdı. Onların arasında dövlət xadimləri, sabiq dövlət və hökumət başçıları, dünya şöhrətli alimlər, Nobel mükafatı laureatları vardı.

Tədbir iştirakçılarından biri - amerikalı astrofizik və kosmoloq, Kaliforniya Universitetinin professoru, Nobel mükafatı laureatı Corc Smut Ficerland Bakı Beynəlxalq Forumu haqqında təəssüratlarını bölüşərək bildirdi ki, artıq ikinci dəfədir Azərbaycana gəlir. Birinci dəfə gələndə üçüncü Bakı Beynəlxalq Humanitar Forumunda iştirak edib, eyni zamanda, Bakı Dövlət Universitetinin qonağı olub, bu şöhrətli təhsil ocağının müəllim və tələbələri qarşısında mühazirə oxuyub.

Corc Smut daha sonra dedi: - Bakıda belə bir forumun keçirilməsini yüksək qiymətləndirirəm. Çünki burada iştirak edən təcrübəli insanlar bir-biri ilə görüşərək fikir mübadiləsi aparmağa, öz təcrübələrini bölüşməyə imkan tapırlar. Yaxşı olardı ki, bu cür tədbirlərdə Qafqaz və Xəzəryanı dövlətlərin nümayəndələri bir yerə yığışıb öz problemlərini daha geniş şəkildə müzakirə edərək bir nəticəyə gələydilər. Məsələ bundadır ki, dünyada konfliktlər gündən-günə daha da ağırlaşır və onların müzakirə edilərək həllinin tapılması aktual məsələyə çevrilir. Belə problemlərin həllində isə dövlətlərarası dialoqun rolu böyükdür. Mən deyərdim ki, sivilizasiyaları, müxtəlif xalqları bir araya gətirən belə  forumların Azərbaycanda keçirilməsi ölkə üçün böyük uğurdur.

Azərbaycan Bakı Beynəlxalq Humanitar Forumu kimi tədbirlərə ev sahibliyi etməklə dünyada sülh və sabitlik yaradılması işinə mühüm töhfələr verir. Biz artıq yaxşı bilirik ki, Azərbaycanda əsrlər boyu müxtəlif millətlərin nümayəndələri dostluq və qardaşlıq şəraitində yaşayıblar. Ölkə dünyada özünün tolerantlığı ilə ad qazanıb. 

Hazırladı:

Paşa ƏMİRCANOV,

“Xalq qəzeti”