Beynəlxalq Münasibətlərin Araşdırılması Mərkəzinin  (BMAM) sədri Rufiz Qonaqov “Sülh və Demokratiya İnstitutu”nun rəhbəri, hüquq müdafiəçisi Leyla Yunusun hüquq-mühafizə orqanı əməkdaşları tərəfindən saxlanılmasına münasibət bildirərkən demişdir:

 – Leyla Yunus müxtəlif vaxtlarda yaratdığı şoularla Azərbaycanın uğurlarını gözü götürməyən qüvvələri ölkəmizə qarşı yönəltməyə cəhd edib. Onun bu antimilli hərəkətləri  dövlətimizin imicinə xələl gətirmək məqsədi daşıyıb. Bu, həm də uzun müddət hakimiyyətə qərəzli mövqedə dayanan insanların bəd niyyətlərindən xəbər verir.

Bəzi dağıdıcı müxalif dairələr də onu dəstəkləyərək, yaratdığı şoulara bəraət qazandırmaqla diqqət mərkəzinə çevrilməyə çalışıblar. Dəfələrlə bəyan etmişik ki, Azərbaycanda fəaliyyətləri ilə cinayətlərə yol vermiş insanlar mövcuddur. Leyla Yunus kimiləri isə onları “siyasi məhbus” siyahısına salmaqla beynəlxalq ictimaiyyəti çaşdırmaq, Azərbaycanın üzərinə qaldırmaq niyyətində olublar. Belə şoular yaratmaqla Leyla Yunus özünün də “siyasi məhbus” kimi həbs olunması ssenarisini planlaşdırıb. Azərbaycan Konstitusiyasını, qanunları pozan, ölkəmizin milli maraqlarına zidd hərəkət edən hər  kəs qanun qarşısında cəzasını almalıdır.

Qələmə aldı: Əliqismət BƏDƏLOV,

“Xalq qəzeti”