Milli Televiziya və Radio Şurası (MTRŞ) “Reklam haqqında” Qanunu pozan televiziya kanalları ilə bağlı yaxın vaxtlarda ciddi tədbirlər görəcək. Bu barədə Trend-ə MTRŞ sədri Nuşirəvan Məhərrəmli açıqlama vermişdir.

N.Məhərrəmli qeyd etmişdir ki, reklam pozuntuları ilə bağlı monitorinq davam etdirilir, ciddi şəkildə ölçü götürülür: “Bilirsiniz ki, son zamanlar bəzi televiziya kanallarına bununla bağlı xəbərdarlıq da olundu. Bəzi telekanallarda reklam haqqında qanun pozulub. Ona görə də onlara qarşı tədbir görəcəyik. Kanalların adını çəkmirəm, amma yaxın vaxtlarda həmin televiziya kanalları ilə bağlı bir ölçü götürəcəyik”.

MTRŞ sədri televiziya kanallarında reklam vaxtı səsin yüksəlməsi məsələsinə də münasibət bildirmişdir. N.Məhərrəmli hesab edir ki, televiziyaların hamısında reklamla bağlı vahid qayda tətbiq olunmalıdır: “Reklamları televiziya kanalları özləri çəkmirlər, reklam şirkətləri çəkirlər. Təbii ki, televiziya kanalları reklamları alarkən bu məsələlərə diqqət yetirməlidir. Azərbaycan qanunvericiliyində bununla bağlı xüsusi maddələr yoxdur, amma vahid bir proqram siyasəti olmalıdır və səslər də ona uyğunlaşdırılmalıdır”.

Reklam vaxtı ekranın aşağısında reklam müddətini göstərən subtitr olması məsələsinə gəlincə, N.Məhərrəmli qeyd etmişdir ki, bu, televiziya kanallarının özünə aid olan məsələdir, onlar özləri bunu verib-verməməyi müəyyənləşdirir.