“Azərbaycanda Seçki Məcəlləsinin qəbul edildiyi 2003-cü ildən bu günə qədər seçki qanunvericiliyinə 16 dəfə dəyişiklik və əlavələr edilmişdir”.

APA-nın məlumatına görə, bunu Azərbaycan Milli Məclisinin Hüquq siyasəti və dövlət quruculuğu komitəsinin sədri Əli Hüseynli parlamentdə keçirilən beynəlxalq seminarda demişdir. O bildirmişdir ki, bu müddət ərzində Seçki Məcəlləsinin 250 maddəsinə dəyişiklik edilmiş, 30 maddə məcəllədən çıxarılmış, 20-yə yaxın maddə isə əlavə olunmuşdur: “Seçki Məcəlləsinə edilən dəyişikliklər Azərbaycanda demokratiyanın inkişafı ilə bağlı olmuşdur”.

Komitə sədri əlavə etmişdir ki, 1995-ci ildə qəbul edilən konstitusiya Azərbaycanda demokratik seçki sisteminin əsasını müəyyənləşdirmişdir. 2003-cü ildə vahid Seçki Məcəlləsi qəbul edilənədək ölkədə prezident, parlament və bələdiyyə seçkiləri ayrı-ayrı qanunlarla tənzimlənirdi.

Ə. Hüseynli Azərbaycanda seçki qanunvericiliyinin tətbiqi barədə məlumat verərək professional seçki idarəetmə strukturu yaradıldığını qeyd etmişdir: “Müasir dünyada demokratik seçkilərin vacib prinsiplərindən biri seçki prosesinin şəffaflığı hesab olunur. Seçkilərdə şəffaflıq “exit-poll”arın keçirilməsi, barmaqların rəngsiz mürəkkəblə boyanması, seçki məntəqələrində veb-kameraların quraşdırılması ilə özünü göstərir. Şəffaflığı təmin edən sadaladığım elementlərin hamısı Azərbaycan Seçki Məcəlləsində öz əksini tapmışdır”.