Artıq dörd ildir ki, ABŞ-da “Qarabağ” Fondu fəaliyyət göstərir. Təşkilatın məqsədi amerikalıları Azərbaycan, xüsusən onun Qarabağ regionu ilə  tanış etmək,  xalqımızın mədəniyyətini və incəsənətini, adət-ənənələrini bu ölkədə təbliğ etməkdir. Bunun üçün Fond müxtəlif tədbirlər təşkil edir,  çoxsaylı layihələr həyata keçirir.

AzərTAc xəbər verir ki, bu barədə Üçüncü Bakı Beynəlxalq Forumunda iştirak edən  “Qarabağ” Fondunun  icraçı direktoru Diana Altman Koen jurnalistlərə müsahibəsində məlumat vermişdir.

D.A.Koen bildirmişdir ki, ötən il Fond çoxlu sayda layihə həyata keçirmiş, o cümlədən bir neçə mühüm sərgi təşkil etmişdir.  O demişdir: “Təşkilat  Azərbaycanın tarixinə, mədəniyyətinə və mətbəxinə  həsr olunmuş  bu sərgilərin köməyi ilə ölkəni olduğu kimi göstərməyə çalışır. Bununla Fond Azərbaycanı hərtərəfli dəstəklədiyini nümayiş etdirir.

D.Altman onu da bildirmişdir ki, Ermənistan-Azərbaycan, Dağlıq Qarabağ  münaqişəsinin tarixi, mahiyyəti və ədalətli həlli yolları barədə amerikalıları məlumatlandırmaq məqsədi daşıyan tədbirlərin təşkil edilməsi  “Qarabağ” Fondunun fəaliyyət istiqamətlərindən biridir.