Bakı Beynəlxalq Humanitar Forumunda aparılan müzakirələr müasir dünyamız üçün xüsusi aktuallıq kəsb edir. 

Bu sözləri Forumda iştirak edən Sudan Prezidentinin köməkçisi Nafi Əli Nafi AzərTAc-a müsahibəsində söyləmişdir.

Forumun müxtəlif mədəniyyətləri təmsil edən xalqlar arasında dostluq əlaqələrinin qurulmasına və möhkəmlənməsinə yaxşı imkan yaratdığını vurğulayan Sudan Prezidentinin köməkçisi müzakirə olunan məsələlərin önəmini vurğulamışdır.   

Ermənistan-Azərbaycan, Dağlıq Qarabağ münaqişəsi ilə bağlı sualı cavablandıran Nafi Əli Nafi ölkəsinin Azərbaycanın ərazi bütövlüyünü dəstəklədiyini, BMT Təhlükəsizlik Şurasının və digər beynəlxalq təşkilatların problemin həllinə dair qəbul etdikləri qətnamə və qərarların yerinə yetirilməsinin tərəfdarı olduğunu vurğulamışdır.

Azərbaycana ikinci dəfədir səfər etdiyini söyləyən Sudan Prezidentinin köməkçisi xalqımızın qonaqpərvərliyindən danışmış, ölkəmizdə sürətli inkişaf proseslərinin getdiyini vurğulamışdır.

 Azərbaycana bu dəfə böyük nümayəndə heyəti ilə gəldiyini deyən Nafi Əli Nafi keçirdiyi görüşlərdə ölkələrimiz arasında əlaqələrin inkişafına dair məsələlərin müzakirə edildiyini diqqətə çatdırmışdır. O, Sudanın Azərbaycan ilə iqtisadi sahədə əməkdaşlığın inkişaf etdirilməsində maraqlı olduğunu söyləmişdir.

Nafi Əli Nafi demişdir: “Sudanda neft, qızıl yatarlarının işlənməsi, mədənçıxarma sənayesi və xidmətlərin göstərilməsi sahələrinə investisiya yatırmaq üçün böyük imkanlar vardır. Biz Azərbaycan şirkətlərini Sudana sərmayə yatırmağa dəvət edirik.

AzərTAc