Bakı Beynəlxalq Humanitar Forumu dünyada gedən müzakirələrə müsbət model təklif etməyə imkan verir. Azərbaycanda belə bir tədbirin keçirilməsi təqdirəlayiqdir.

Bu sözləri Üçüncü Bakı Beynəlxalq Humanitar Forumu çərçivəsində keçirilən “Multikulturalizm və özgünlük: cəmiyyətdə dəyər konsensusu axtarışında” mövzusunda “dəyirmi masa”nın iştirakçısı, Dini Qurumlarla İş üzrə Dövlət Komitəsinin (DQİDK) sədri Elşad İskəndərov jurnalistlərə müsahibəsində demişdir.

E.İskəndərov bildirmişdir ki, Azərbaycanda dinlər və məzhəblər arasında mövcud olan qarşılıqlı hörmət mühiti bu məsələdə mühüm əhəmiyyət kəsb edir. Bu prinsip tolerantlıq konsepsiyasına aiddir. Bu fəlsəfi fikir Azərbaycanda yaşanır və dövlət də bunu dəstəkləyir. E.İskəndərov demişdir ki, biz bunu yalnız ölkə daxilində həyata keçirməklə kifayətlənməməliyik.

Komitə sədri qeyd etmişdir ki, DQİDK-nın təşkilatçılığı ilə BMT və İSESCO-nun baş qərargahlarında müvafiq seminar və sərgilər keçirilir. Avropa Parlamentində də belə bir konfransın keçirilməsi nəzərdə tutulmuşdur. Bununla yanaşı, Azərbaycanda dini azlıqların həyatı və yaşayış tərzi ilə bağlı təqdimatın keçirilməsi də planlaşdırılmışdır.

 DQİDK-nın sədri diqqətə çatdırmışdır ki, Azərbaycana xas olan  tolerantlıq modeli bütün dünyaya çatdırılmalıdır. Bu modelin bütün  dünyada tətbiqi çox vacibdir. O, qeyd etmişdir ki, cari ilin mayından ölkəmizdə “Milli Tolerantlıq Mərkəzi” layihəsinin həyata keçirilməsinə başlanılmışdır. Bu layihə DQİDK ilə BMT arasında müqaviləyə əsasən həyata keçirilir, İSESCO və BMT-nin Sivilizasiyalar Alyansı tərəfindən də dəstəklənir.

AzərTAc