Ukrayna paytaxtındakı Səməd Vurğun adına kütləvi kitabxananın direktoru Qalina Çebotaryova Üçüncü Bakı Beynəlxalq Humanitar Forumunda iştirak edəcəkdir. AzərTAc-ın Ukraynadakı xüsusi müxbiri Qalina Çebotaryova ilə görüşmüş və ondan müsahibə almışdır.

-Qalina Nikolayevna, xahiş edirəm rəhbərlik etdiyiniz kitabxana barədə danışın.

-Kitabxanamız 1974-cü ildə yaradılmışdır. 1978-ci ildən Azərbaycanın görkəmli şairi Səməd Vurğunun adını daşıyır. Yaradıldığı vaxtdan bu kitabxana Ukrayna və Azərbaycan mədəniyyətlərini birləşdirən bir vasitə olmuşdur. Səməd Vurğunun qızı Aybəniz xanım Vəkilova iki dəfə kitabxanamızda olmuş, ona çoxlu kitab və şairin arxivindən fotoşəkillər hədiyyə etmişdir. Burada tez-tez Azərbaycan tarixi və mədəniyyəti ilə bağlı əlamətdar hadisələrə həsr edilmiş tədbirlər və görüşlər keçirilir. Azərbaycan Respublikasının Ukraynadakı səfirliyi ilə kitabxanamız arasında sıx dostluq münasibətləri yaranmışdır. Səfir Eynulla Mədətli tez-tez Səməd Vurğunun Kiyevdəki evinin qonağı olur. Burada Ukraynada yaşayan həmvətənlərlə, Ukraynanın və Azərbaycanın tanınmış mədəniyyət və ictimai xadimləri ilə, alimlərlə, Azərbaycan mədəniyyətinə, poeziyasına, tarixinə hörmət bəsləyən insanlarla görüşmək üçün yaxşı imkan vardır.

Dünən kitabxanada keçirilmiş tədbir - Azərbaycan Xalq Cümhuriyyətinin banilərindən biri, ADR parlamentinin sədri Əlimərdan bəy Topçubaşovun anadan olmasının 150 illiyinə həsr edilmiş konfrans yuxarıda dediklərimə əyani sübutdur.

Dost ölkələrimizin ictimai-siyasi həyatında mühüm hadisə olan bu konfrans Azərbaycanın Kiyevdəki diplomatik nümayəndəliyi və Ukraynanın Azərbaycanlı Alimlər Şurası tərəfindən təşkil edilmişdi.

Xüsusi vurğulamaq istəyirəm ki, Azərbaycan səfirliyi kitabxananı həmişə və hər işdə dəstəkləyir, kitabxana fondunun, onun maddi-texniki bazasının genişlənməsinə qayğı göstərir. Diplomatik nümayəndəlik Ukrayna cəmiyyətini Azərbaycanın tarixi və mədəniyyəti ilə bağlı hadisələr barədə daha çox məlumatlandırmaq üçün kitabxana əməkdaşlarını səfirliyin təşkil etdiyi qəbullara, təqdimatlara və digər ictimai tədbirlərə qatılmağa dəvət edir.

-Bakıya uçuş ərəfəsində əhvalınız və planlarınız necədir?

-Əhvalım çox yüksək, işləmək əzmim böyükdür. Ukrayna nümayəndə heyətinin tərkibinə siyasi dairələrin, elmi ziyalıların, yaradıcı elitanın 40-dan artıq nümayəndəsi daxildir. Cənab səfirin sayəsində mən də həqiqətən planetar miqyaslı bir tədbir olan Bakı forumunda iştirak etmək şərəfinə layiq görülmüşəm. Bu həm böyük qürur, həm də böyük məsuliyyətdir! Əminəm ki, Üçüncü Bakı Beynəlxalq Humanitar Forumunda iştirak etmək Odlar Yurdu, Şərqin incisi Azərbaycan haqqında çoxlu yeni və maraqlı məlumat əldə etmək, Səməd Vurğunun ev muzeyinə baş çəkmək, azərbaycanlı kitabxanaçı həmkarlarımla görüşmək üçün əla fürsət olacaqdır.

Dünyanın ən məşhur siyasətçiləri, elm və mədəniyyət xadimləri ilə birlikdə bəşəriyyətin inkişafının aktual və mühüm məsələlərinin müzakirəsində iştirak etmək üçün bu gözəl imkana görə təşəkkür edirəm.

Forumda Azərbaycan haqqında əldə edəcəyim yeni bilikləri və təəssüratları, qiymətli təcrübəni öz həmkarlarımla, Səməd Vurğun adına kütləvi kitabxananın oxucuları və qonaqları ilə bölüşməyə şad olacağam.

Zeynal AĞAZADƏ,

AzərTAc-ın xüsusi müxbiri

Kiyev