Azərbaycan Prezidenti İlham Əliyev andiçmə mərasimində etdiyi çıxışında ölkəmizin strateji hədəflərini bir daha bəyan etdi. Bunu Trend-ə açıqlamasında Yeni Azərbaycan Partiyasının icra katibinin müavini, deputat Mübariz Qurbanlı demişdir.

M.Qurbanlı bildirmişdir ki, Azərbaycan Prezidenti İlham Əliyev andiçmə mərasimində etdiyi çıxış zamanı Azərbaycanın bölgədə, dünya siyasətində tam müstəqil siyasət aparmaq iqtidarında olması, milli maraqların qorunması, Ermənistanın iqtisadi cəhətdən taqətdən salınaraq sülhə məcbur edilməsi məsələlərinə xüsusi önəm vermişdir.

Millət vəkili vurğulamışdır ki, dövlət başçısı inauqurasiya mərasimində mühüm əhəmiyyət kəsb edən və strateji hədəflərimizi müəyyənləşdirən proqram xarakterli çıxış etmişdir: “Çıxışda Prezident İlham Əliyev strateji hədəf olaraq ərazi bütövlüyümüz və tarixi ədalətin bərpası, Azərbaycanda demoqrafik məsələlər, əhali artımının yüksək səviyyəsi, iqtisadi müstəqilliyimiz, sənaye potensialımızın artırılması, sosial proqramların davam etdirilməsi, regionların inkişafı, dövlətlərarası münasibətlərdə dost ölkələrin sayının daha da artırılması, həmçinin Azərbaycanın beynəlxalq nüfuzunun güclənməsi xüsusi vurğulanmışdır”.