Filip Voytek, Çexiya Moraviya Kommunist Partiyasının sədri:

Olduğumuz məntəqələrə əsasən deyə bilərəm ki, Azərbaycanda prezident seçkiləri yaxşı təşkil edilmişdi. Yerli müşahidəçilərlə yanaşı, bizimlə birgə Belçika, İndoneziya kimi ölkələrdən də müşahidəçilər seçkini izləyirdi.  Mən şahid oldum ki, hər şey normal, demokratik və Avropa standartlarına cavab verən şəkildə həyata keçirildi. Qanunazidd heç bir hal müşahidə etmədik. Seçki Avropa standartlarına uyğun keçdi.

Turegeldiyev Muratkali, Qazaxıstandan olan beynəlxalq müşahidəçi:

Bu, mənim Azərbaycana ilk səfərimdir. İlk dəfədir ki, ölkənizdə beynəlxalq müşahidəçi kimi seçki prosesini izləyirəm. Biz 8 seçki dairəsində, eləcə də bir sıra məntəqələrdə olduq. Seçkiyə hazırlıq yaxşı idi. Heç bir qanun pozuntusu ilə qarşılaşmadıq. Yerli müşahidəçilərlə də görüşüb fikir mübadiləsi apardıq. Seçkilər qanunauyğun şəkildə baş tutdu. İndiyə kimi, bir sıra ölkələrdə seçki proseslərini izləmiş, eləcə də Ermənistanda prezident seçkilərini müşahidə etmişəm. Ancaq Azərbaycanda seçkilər daha yüksək səviyyədə təşkil edilmişdi, düşünürəm ki,  yalnız  yüksək səviyyəli təşkilatçılıqla seçkilər bu cür yaxşı keçə bilərdi. Hər kəs öz vəzifə və öhdəliyini dəqiq bilir və yerinə yetirirdi. Seçki komissiyasının üzvləri təcrübəli şəxslərdən ibarət idi və komanda şəklində işləyirdilər. İnsanlar seçkiyə bayram əhval ruhiyyəsində hazırlaşmışdılar. Mənim ölkəmdə – Qazaxıstanda isə seçki gününü adətən həftə sonuna-bazar gününə təyin edirlər. Sizdə isə seçki günü iş gününə təyin edilsə də, həmin gün bayram edilir, insanlar yüksək əhvalda seçkidə iştirak edirlər.

Söhbəti yazdılar:

Əfsanə BAYRAMQIZI,

Ülviyyə VAHİDQIZI, “Xalq qəzeti”