Qəbələdə keçirilən Beynəlxalq Musiqi Festivalı çərçivəsində biz bu orkestrlə artıq ikinci dəfədir ki, Qaxa gəlirik. Yenidən şəhərin qədim məhəlləsində, açıq səma altında yaradılan bu bənzərsiz səhnədə çıxış edirik. Biz bu səhnəni çox sevirik. Burada bizim üçün hər cür şərait yaradılmışdır. Bu səhnədə çıxış etmək böyük şərəfdir.

AzərTAc xəbər verir ki, bu fikirləri V Qəbələ Beynəlxalq Musiqi Festivalının bədii rəhbərlərindən biri, Üzeyir Hacıbəyli adına Bakı Musiqi Akademiyasının rektoru, xalq artisti Fərhad Bədəlbəyli festival çərçivəsində Qax şəhərindəki “İçəribazar” Turizm və Mədəniyyət Mərkəzində keçirilən səyyar konsertdən sonra jurnalistlərə müsahibəsində bildirmişdir.

Son bir il ərzində Qaxda böyük dəyişikliklərin baş verdiyini, yeni yolların çəkildiyini, gözəl binaların tikildiyini, şəhərin daha da gözəlləşdiyini vurğulayan Fərhad Bədəlbəyli demişdir: “Biz, Amerikadan gəlmiş tanınmış pianoçu Oksana Yablonskaya ilə birlikdə təbiətin qoynuna çıxdıq. O deyir ki, bu nə möcüzədir, dünyanı gəzmişəm, heç yerdə belə gözəllik görməmişəm. Bu, həqiqətən də belədir. Bəli, Azərbaycan dünyada ən gözəl məkandır. Mən ulu öndərimiz Heydər Əliyevin bu sözlərini bir daha yada salmaq istərdim: ”Mən həmişə demişəm, bu gün də deyirəm, mən fəxr edirəm ki, azərbaycanlıyam".