Azərbaycanın məşhur alimi akademik Cəlal Əliyevin 85 illik yubileyinə həsr olunmuş “Cəlal Əliyev: Davamlı inkişaf üçün fotosintez tədqiqatları–2013” mövzusunda beynəlxalq konfransda müzakirə edilən problemlər qlobal əhəmiyyətə malikdir.

Rusiya Kənd Təsərrüfatı Elmləri Akademiyasının vitse-prezidenti, akademik, biologiya elmləri doktoru İvan Sobçenko bu sözləri AzərTAc-ın müxbirinə verdiyi müsahibədə söyləmişdir.

Rusiyalı alim demişdir ki, fotosintez prosesinin və onunla bağlı bütün məsələlərin öyrənilməsi ötəri hal deyil, daim araşdırılmasına ehtiyac olan fundamental hadisədir. “Fotosintez” sözünün hərfi mənası “işığın təsiri ilə hər hansı birləşmələrin yaradılması” deməkdir. Planetimizdə bütün metabolik proseslər üçün enerji mənbəyi Günəşdir.

İvan Sobçenko qeyd etmişdir ki, Cəlal Əliyev Rusiya Kənd Təsərrüfatı Elmləri Akademiyasının fəxri üzvüdür. O, dünya elminə böyük töhfələr vermişdir. Məhz onun sayəsində “yaxşı” fotosintez və “ideal” buğda haqqında anlayışlar yaranmışdır.

İvan Sobçenko müsahibəsinin sonunda yubilyarı ürəkdən təbrik etmiş və ona elmi fəaliyyətində yeni uğurlar arzulamışdır.