Bakıda keçirilən Birinci Beynəlxalq Gələcək Forumu çərçivəsində informasiya-kommunikasiya texnologiyaları (İKT) sektorunun inkişafı və “Azərbaycan -2020: gələcəyə baxış” inkişaf konsepsiyası çərçivəsində onun rolu məsələləri xarici ekspertlərlə birlikdə müzakirə ediləcəkdir.

AzərTAc xəbər  verir ki, Azərbaycan Respublikası rabitə və informasiya texnologiya naziri Əli Abbasov bu sözləri jurnalistlərə müsahibəsində söyləmişdir.

Nazir demişdir ki, konsepsiyada iqtisadi potensialın qeyri-neft sektoru hesabına iki dəfə artırılması nəzərdə tutulur. Bu məqsədlə bir sıra tədbirlər görülür, o cümlədən əlverişli rəqabət mühiti yaradılır, əmək ehtiyatlarının inkişafına, investisiyalar cəlb edilməsinə diqqət artırılır. Azərbaycanda texnoparklar şəbəkəsi və onların maliyyə dəstəyi üçün bir sıra fondlar, o cümlədən İKT-nin inkişafı fondu yaradılır. İnsan resurslarının inkişafı istiqamətində təhsil sektorunun genişlənməsi, İKT üzrə ali təhsil müəssisəsi - informasiya texnologiyaları universiteti yaradılması planlaşdırılır.

Əli Abbasov onu da qeyd etmişdir ki, gələcəkdə İKT sektoru Azərbaycan iqtisadiyyatının inkişafında neft sektorundan sonra ən mühüm sahə olacaqdır. İKT sektoru bütün dünyada iqtisadiyyatın inkişafının prioritet istiqamətidir. Bu gün gəlirləri enerji sektorundan asılı olan ölkələrin çoxunda İKT-nin inkişafına xüsusi diqqət yetirilir. Neft gəlirlərinin İKT sektorunun inkişafına düzgün transformasiyası, həmçinin gələcəkdə iqtisadiyyatın davamlı inkişafının təmin edilməsi ölkələrin çoxunu maraqlandırır. Bu məsələ forum çərçivəsində müzakirə edilən əsas mövzulardan biri olacaqdır.