Rusiya Xəzər dənizinin sahillərində həmişə Azərbaycanın strateji tərəfdaşı olmuşdur.

Bu fikri jurnalistlərə müsahibəsində Həştərxan vilayətinin qubernatoru Aleksandr Jilkin səsləndirmişdir.

Həştərxan vilayətinin böyük Rusiyanın kiçik hissəsi kimi bu münasibətləri genişləndirməyə çalışdığını vurğulayan qubernator demişdir: “Bilirsiniz ki, indi ölkələrimiz arasında əmtəə dövriyyəsi  üç milyard dollardan artıqdır. Rusiya Prezidenti ölkənin subyektləri, habelə  Həştərxan vilayəti qarşısına əmtəə dövriyyəsinin həcmini  artıraraq beş milyard dollara çatdırmaq vəzifəsi qoymuşdur”.

O bildirmişdir ki, Azərbaycan Prezidenti İlham Əliyevin və Azərbaycan dövlətinin Həştərxan vilayətinə münasibətdə  mövqeyini xüsusi vurğulamaq lazımdır. A.Jilkin demişdir: “Bu mövqe humanitar, sosial, idman, gənclər sahələrində və əlbəttə,  iqtisadiyyat sahəsində təzahür edir. Bura müştərək biznes layihələrini, Xəzər dənizinin ehtiyatlarından istifadə olunmasını, gəmiqayıranların əməkdaşlığını şamil etmək olar. Hesab edirəm ki, bu gün Həştərxan vilayəti Azərbaycan və Azərbaycan xalqı  ilə münasibətlərin inkişafında daha böyük yüksəliş yaşayır”.

AzərTAc