Heydər Əliyev keçmiş Sovet İttifaqının inkişafı üçün çox işlər görmüş görkəmli dövlət xadimidir. AzərTAc xəbər verir ki, bu fikri jurnalistlərə müsahibəsində  Həştərxan şəhərinin meri Mixail Stolyarov səsləndirmişdir. 

Həştərxan  ilə Azərbaycan arasında çox sıx dostluq münasibətləri yarandığını bildirən M.Stolyarov demişdir: “Biz sosial və iqtisadi sahələrdə əməkdaşlıq edirik. Heydər Əliyev adına məktəb  Azərbaycan tərəfinin köməyi ilə tamamilə yeni görkəm almış və təhsillə bağlı çoxsaylı tədbirlərin keçirilməsi məkanına çevrilmişdir”.

M.Stolyarov bildirmişdir ki, bu istiqamətdə əməkdaşlıq davam etdirilir və artıq Həştərxanda Azərbaycan Konqres Mərkəzinin  və uşaq bağçasının tikintisi barədə razılaşma vardır.

Mer demişdir: “Heydər Əliyev adına park, uşaq meydançası  şəhər sakinlərinin sevimli istirahət guşəsinə çevrilmişdir. Azərbaycan-Rusiya dostluq körpüsü şəhər sakinlərinin bir sahildən o biri sahilə keçməsini asanlaşdırmışdır. Odur ki, bu obyektlər təkcə  əlaqələrimizə hörmət əlaməti deyil, həm də şəhər sakinlərinin ehtiyac duyduqları layihələrdir”.

Elşən ŞAHBALAYEV,

AzərTAc-ın xüsusi müxbiri

Həştərxan