Səfir Fransa parlamentində Dağlıq Qarabağla dostluq qrupunun yaradılması xəbərinin əsassız olduğunu bildirmişdir

“Fransa Dağlıq Qarabağın müstəqilliyini tanımır, Dağlıq Qarabağ suveren Azərbaycanın bir hissəsidir. Bizim bu məsələdə siyasətimiz dəyişməmişdir”. APA-nın məlumatına görə, bu açıqlamanı jurnalistlərə Fransanın Azərbaycandakı səfiri Paskal Mönye vermişdir.

Fransa parlamentində Dağlıq Qarabağla dostluq qrupunun yaradılması barədə sualı cavablandıran səfir bildirmişdir ki, bu məlumat əsassızdır: “Bəzi parlament üzvləri bu təşəbbüslə çıxış etmişlər. Bu, rəsmi qrup deyil, bəzi parlament üzvlərinin şəxsi təşəbbüsüdür. Fransa Dağlıq Qarabağın müstəqilliyini tanımır, Dağlıq Qarabağ suveren Azərbaycanın bir hissəsidir. Bizim bu məsələdə siyasətimiz dəyişməmişdir”.

Səfir bildirmişdir ki, Fransada söz azadlığı mövcuddur, lakin bu təşəbbüs ölkənin rəsmi mövqeyini əks etdirmir: “Fransa parlamentində Azərbaycan və Ermənistanla parlamentlərarası dostluq qrupu fəaliyyət göstərir”.

Xatırladaq ki, Ermənistanın bəzi kütləvi informasiya vasitələri Fransa parlamentində Dağlıq Qarabağla dostluq qrupunun yaradıldığı barədə xəbər yaymışlar.