Fevralın 5-də dahi Azərbaycan bəstəkarı və pedaqoqu, SSRİ xalq artisti, Sosialist Əməyi Qəhrəmanı Qara Qarayevin doğum günündə böyük sənətkarın xatirəsi anılmışdır.

AzərTAc xəbər verir ki, tanınmış mədəniyyət və incəsənət xadimləri, ictimaiyyət nümayəndələri Fəxri Xiyabana gələrək Qara Qarayevin məzarını ziyarət etmiş, üzərinə təzə-tər güllər düzmüşlər.

Anma mərasimində Azərbaycan Bəstəkarlar İttifaqının sədri, xalq artisti Firəngiz Əlizadə, bəstəkar, əməkdar incəsənət xadimi, professor Sevda İbrahimova, xalq artistləri Musa Mirzəyev, Rəfiqə Axundova və başqaları çıxış edərək Qara Qarayevin 95 illik yubileyi ilə əlaqədar ölkəmizdə silsilə tədbirlərin keçirildiyini diqqətə çatdırmışlar.

Qara Qarayev yaradıcılığının böyük məktəb olduğunu vurğulayan natiqlər dahi bəstəkarın yaratdığı musiqi ənənələrindən söz açmışlar.

Tədbirdə dahi bəstəkarın keçdiyi dərslərin yüksək peşəkarlığından söhbət açılmış və qeyd edilmişdir ki, onun dünya şöhrətli  əsərləri bu gün də dünya səhnələrində səslənməklə mükəmməlliyini bir daha sübut edir. O, bir çox filmlərə, tamaşalara musiqi bəstələmişdir. Qara Qarayev Azərbaycan musiqisinə böyük töhfələr vermiş dahidir.