Bu gün hər birimizin ürəyi sevinclə, fəxrlə döyünür. Qürur duyuruq ki, belə gözəl, möhtəşəm bir məktəbdə əmək fəaliyyətimizi davam etdirəcəyik, şagirdlərimiz hər cür şəraiti olan bu elm ocağında təhsil alacaqlar.

Yeni ilin ilk dərs günündə bizə belə gözəl məktəb hədiyyə etdiyinə görə müstəqil Azərbaycanın memarı və qurucusu ulu öndərimiz Heydər Əliyevin siyasətini uğurla davam etdirən Prezident İlham Əliyevə kollektivimiz adından dərin minnətdarlığımızı bildirir, məktəbin tikintisində əməyi keçən hər bir kəsə “Sağ olun” deyirik.

Bu fikirləri Zaqatala rayonunun Danaçı kənd 2 nömrəli tam orta məktəbinin direktoru Məryəm Rzaqova AzərTAc-a müsahibəsində bildirmişdir.

M.Rzaqova demişdir: “Ucqar kəndlərdən olan Danaçıda qısa bir müddətdə 3 məktəb binasının, 500-dək evin tikilməsi, çəkilişi tamamlanmaq üzrə olan qaz və su layihələrinin həyata keçirilməsi dövlətimizin başçısının ölkə vətəndaşlarına qayğısının bariz nümunəsidir. Biz fəxr edir, sevinirik ki, Azərbaycanın bu günü və gələcəyi çox etibarlı əllərdədir. Biz müəllimlər çalışacağıq ki, bugünkü gənclər savadlı və Vətənə sədaqətli övladlar kimi yetişsinlər”.

AzərTAc