"Azərbaycana növbəti səfərimizi çox yüksək qiymətləndirirəm. Azərbaycan Respublikası Milli Məclisi ilə Rusiya Federasiyası Federal Məclisi arasında əməkdaşlıq üzrə Parlamentlərarası Komissiyanın X iclasında, eləcə də Bakıya səfərimiz çərçivəsində keçirdiyimiz görüşlərdə hər iki tərəf üçün mühüm əhəmiyyət kəsb edən məsələləri müzakirə etmişik".
Bu sözləri jurnalistlərə müsahibəsində Parlamentlərarası Komissiyanın Rusiya tərəfdən həmsədri, Federal Məclisin Federasiya Şurası sədrinin müavini Svetlana Orlova söyləmişdir.
S.Orlova demişdir: "Azərbaycanda iki il əvvəl olmuşam. Ötən müddət ərzində Bakı xeyli dəyişmişdir. Gördüklərimizin hamısı Azərbaycanın sürətli inkişafının göstəricisidir. İnanırıq ki, Azərbaycan daha da inkişaf edəcək və daha böyük uğurlar qazanacaqdır".
Parlamentlərarası Komissiyanın işinə toxunan rusiyalı həmsədr demişdir ki, X iclasda Azərbaycan ilə Rusiya arasında siyasi, iqtisadi- ticari, xüsusən də kənd təsərrüfatı, təhsil, maşınqayırma və humanitar sahələrdə əlaqələrin inkişafı barədə məsələlər müzakirə olunmuşdur. İclasda mövcud olan bürokratik problemlərin həlli ilə bağlı konkret addımların atılmasının vacibliyi vurğulanmış, müxtəlif sahələrdəki problemlərin tezliklə həllinə nail olmaq üçün deputatlardan, müvafiq hökumət strukturlarının nümayəndələrindən ibarət işçi qruplar yaradılmışdır. Miqrasiya, innovasiya və diaspor məsələləri də diqqət mərkəzində olmuşdur.
S.Orlova bildirmişdir ki, miqrantlarla bağlı bütün ölkələrdə olduğu kimi, Rusiyada da problemlər vardır. Bu sahədəki problemlər müvafiq dövlət strukturları tərəfindən həll olunur. Sevindirici haldır ki, Rusiyada azərbaycanlı miqrantlar və Azərbaycan diasporu ilə heç bir problem yoxdur.

AzərTAc