Dünyanın müxtəlif ölkələrindən nüfuzlu ziyalıların, siyasət, ədəbiyyat, media nümayəndələrinin və digər mühüm humanitar sahənin mütəxəssislərinin qatıldığı İkinci Bakı Beynəlxalq Humanitar Forumu elə ilk gündən böyük razılıq və fəal müzakirələrlə yadda qaldı.
Forum iştirakçılarının hər birinin bu il keçirilən mühüm beynəlxalq tədbirlə bağlı öz fikir və təəssüratları, gözləntiləri var idi. Belə ki, forumun rəsmi hissəsinin başa çatmasından sonra bir sıra qonaqlarla həmsöhbət olduq. Macarıstandan olan müstəqil ekspert İnotai Andras Bakının belə bir beynəlxalq foruma ev sahibliyi etməsini və bu təşəbbüslə çıxış etməsini məmnunluqla qarşılayıb: - Forumda iştirak etməkdən məmnunam. Bu mənim Bakıya ikinci səfərimdir. Bildiyiniz kimi, XX əsr qloballaşma prosesi gedir. Belə bir dövr çox vacibdir. Çünki biz getdikcə qloballaşan dünyada yaşayırıq. Ətraf mühit, təhlükəsizlik, eləcə də digər mövzular var ki, fikir ayrılığı yaradır. Lakin bununla belə biz bir-birimizi anlamalı, bir-birimizin fikrinə hörmətlə yanaşmalıyıq. Bu baxımdan dövlətlər cəmiyyətdə bu sülhsevərliyi və humanist addımı yüksək qiymətləndirməli və bu səviyyəni qaldırmalıdırlar.
Qloballaşma dövründə təhsil önəmli yer tutur. Bu baxımdan mən forumda bu mövzuda çıxış etdim. Əgər əvvəlki dövrlərdə kənd təsərrüfatı, sənaye əsas sahə hesab edilirdisə, indi artıq dövr dəyişib. Bugün qloballaşma dövründə təhsil, eləcə də insan kapitalı əsas yer tutur. Təhsil sahəsi çox vacib investisiyadır.
Bu baxımdan, biz bazarın tələbatına uyğun balanslı şəkildə işləməliyik. İnanıram ki, forumda maraqlı müzakirə və fikir mübadilələri olacaq.
Ayfer Altay, Haccetepe Universitetinin professoru: Bakının ev sahibliyi etdiyi Beynəlxalq Humanitar Forumun keçirilməsini yüksək qiymətləndirirəm. Bu cür tədbirlər ziyalıların səmərəli fikir mübadiləsi üçün çox vacib və faydalıdır. Foruma Azərbaycan Dillər Universitetinin dəvəti ilə qatılmışam. Məruzə etməsəm də, hər halda müzakirələri izləmək mənim üçün maraqlıdır. Mənim ixtisasım dillə bağlıdır. Məlum olduğu kimi, qloballaşma şəraitində əcnəbi dillərdən bəzi sözlər digər dillərə məcburi olaraq keçir. Bu baxımdan, çalışmalıyıq ki, qloballaşma dövründə öz dilimizin saflığını itirməyək.
Vladimir Voynoviç, Rusiyalı yazıçı: - Bakıya ilk səfərimdir. Çox gözəl şəhəriniz var. Bakı Slavyan Universitetində görüşüm oldu. Oradakı gözəl müəllim və tələbə kontingenti məni valeh etdi. Görüşümüz maraqlı müzakirələrlə yadda qaldı. Foruma gəldikdə isə, bu tədbir ilk gündən məndə yüksək təəssürat yaratdı.
Elmar Hüseynov, "Planetin səsi" ( "Exo Planetı") jurnalının baş redaktoru: - Azərbaycan çox streteji mövqedə, Şərqlə Qərbin qovşağında yerləşir. İlk humanitar forumda iştirak etməsəm də, ilk forumdan sonra onun beynəlxalq səviyyədə belə bir tədbirə çevrilməsi məni valeh etdi. Burada əvvəlki tədbirdən fərqli olaraq, auditoriya daha genişdir. Dünyanın müxtəlif ölkələrindən gəlmiş nümayəndələrlə tanış oldum və söhbət etmək imkanı əldə etdim. Forumun keçirildiyi bina Heydər Əliyev Mərkəzi, əslində, həm də Azərbaycanın inkişaf dinamikasının simvolunun göstəricisidir. İnanıram ki, Bakı Beynəlxalq Humanitar Forumu iştirakçılar üçün faydalı olacaq.

Söhbətləşdi: Əfsanə BAYRAMQIZI, "Xalq qəzeti"