İkinci Bakı Beynəlxalq Humanitar Forum çərçivəsində keçirilən "Müasir KİV-lər və yeni çağırışlar" mövzusunda "dəyirmi masa" çox yüksək səviyyədə təşkil olunmuşdur. Mən belə forumların davamlı olmasını arzulayıram. 
Bu sözləri AzərTAc-a müsahibəsində Türkiyənin "Milliyyet" qəzetinin əməkdaşı, tanınmış siyasi icmalçı Semih İdız söyləmişdir. Siyasi icmalçı bildirmişdir ki, İkinci Bakı Beynəlxalq Humanitar Forumunun keçirilməsi siyasət, elm, təhsil, mədəniyyət, mətbuat və digər sahələrdə çalışan insanların bir araya toplanması və müxtəlif mədəniyyətə malik xalqlar arasında ünsiyyətin yaradılmasında mühüm əhəmiyyət kəsb edir.
Semih İdız forumun müxtəlif sahələrdə bir sıra məsələləri müzakirə etmək üçün geniş imkanlar açdığını və mədəni dialoq məsələlərinin müzakirəsi üçün çox önəmli bir hadisə olduğunu vurğulamışdır. Jurnalist demişdir: "Forumda iştirak edən müxtəlif ölkələrin nümayəndələri bir-biri ilə ünsiyyət qurur, təcrübə mübadiləsi aparırlar ki, bu da çox faydalıdır. Azərbaycana təşəkkür etmək lazımdır ki, belə xoşməramlı tədbirləri təşkil etməklə müxtəlif ölkələrin ziyalılarını bir araya gətirir və bəşəriyyəti narahat edən problemin müzakirəsində, onların həll yollarının tapılmasında əhəmiyyətli rol oynayır".