Mən Bakının arxitekturasına, şərq və qərb üslublarının sintezinə, Avropa üslubunda tikilmiş binalara, məscidlərə valeh olmuşam. Bu, mənim Azərbaycana ilk gəlişim deyildir və qeyd edim ki, Bakı ildən-ilə gözəlləşir.
Bu sözləri Ukraynanın "Den" qəzetinin icmalçısı Yuri Rayxel AzərTAc-a müsahibəsində söyləmişdir.
İkinci Bakı Beynəlxalq Humanitar Forumunda iştirak etmək üçün Bakıya gəlmiş Yuri Rayxel qeyd etmişdir ki, Azərbaycandakı mehribanlıq və qonaqpərvərlik onun hüdudlarından çox-çox uzaqlarda bəllidir. Qonaq demişdir: "Ümumiyyətlə, Ukrayna Azərbaycanın böyük dostudur, bizim aramızda çox sıx iqtisadi və mədəni əməkdaşlıq mövcuddur. Düşünürəm ki, bütün sahələrdə - həm iqtisadi, həm hərbi-texniki, həm də diplomatik sahələrdə əməkdaşlığımız bundan sonra da yalnız inkişaf edəcəkdir".