Respublika Seymoloji Xidmət Mərkəzində kompleks tədqiqatların aparılması və işin keyfiyyətinin yüksəldilməsi məqsədi ilə Xəzər dənizinin Azərbaycan sektorunda ilk dəfə olaraq dənizdibi seysmik stansiyaların quraşdırılmasına başlanılmışdır.
AzərTAc xəbər verir ki, bu sözləri oktyabrın 8-də Bakıda öz işinə başlayan "Seysmiklik, zəlzələlərin proqnozu, tikililərin zəlzələyə davamlılığı" mövzusunda V Beynəlxalq konfransda iştirak edən Baş nazirin müavini Abid Şərifov jurnalistlərə müsahibəsində demişdir.
Baş nazirin müavini bildirmişdir ki, bu stansiyalar dənizdə baş verən zəlzələlərin daha dəqiq qeydiyyatını aparmaq, Xəzərin seysmikliyini, dərinlik quruluşunu, karbohidrogen yataqlarında geodinamik şəraiti qiymətləndirməyə imkan verəcəkdir.
Azərbaycanda 1967-ci ilədək tikilən binalarda heç bir antiseysmik tədbirlər görülmədiyini və zəlzələlərə davamlılığın nəzərə alınmadığını söyləyən A.Şərifov qeyd etmişdir ki, hazırda bununla bağlı Fövqəladə Hallar Nazirliyində xüsusi qurum yaradılmışdır.
A.Şərifov, həmçinin Bakıda "Xruşşovka"ların sökülməsi məsələsinin hələlik gündəmdə olmadığını da bildirmişdir.