Bakı Beynəlxalq Humanitar Forumunda iştirak edən "Şərq Qərbi qarşılayır" Beynəlxalq Fondun rəhbəri, Belçika şahzadəsi Stefani Vindiş-Qrəts Qəbələyə səfərinin yekununda jurnalistlərə müsahibə vermişdir. 
AzərTAc xəbər verir ki, belçikalı qonaq Azərbaycanın paytaxtı ilə yanaşı, bölgələrinin də sürətlə inkişaf etdiyini söyləmiş, Qəbələdə gördüklərindən heyran olduğunu bildirmişdir.
Şahzadə Stefani Vindiş-Qrəts demişdir: "Çoxdandır ki, Azərbaycana gəlmək arzusunda idim. Bu füsunkar diyarda Şərq mədəniyyəti ilə bağlı olan hər şey məndə maraq doğurur. Belə gözəl bir yerdə, dağlar, meşələr qoynunda yerləşən Qəbələni görmək mənə daha xoş oldu. Bakı Beynəlxalq Humanitar Forumunda iştirakım həm də Azərbaycanı yaxından tanımağa gözəl imkan yaratmışdır. Mən qədim yaşayış məskəni Qəbələ, müasir şəhərdəki emal müəssisələri, turizm obyektləri ilə tanış oldum. Qəbələdə insanlar üçün yüksək məvacibli yeni iş yerlərinin açılmasının, dünya standartlarına uyğun məhsul istehsalının şahidi oldum. Gördüklərim mənə xoş təəssürat bağışladı".
Qonaq xalqların və dövlətlərin yaxınlaşması və mədəniyyətlərarası dialoqun genişlənməsi baxımından Bakı Beynəlxalq Humanitar Forumunun əhəmiyyətini yüksək qiymətləndirmişdir.