Beynəlxalq Mətbuat Mərkəzində Bakı Beynəlxalq Humanitar Forumunun iştirakçısı, tanınmış Rusiya yazıçısı və jurnalisti Andrey Konstantinovla görüş keçirilib.
"Baku" jurnalının təşkil etdiyi görüşdə Azərbaycanın Sankt-Peterburqdakı baş konsulu Qüdsi Osmanov, "Baku" jurnalının baş redaktorunun müavini Tamilla Əhmədova, "Fontanka.Ru" internet portalının baş direktoru Aleksandr Daşkov, "Delovoy Peterburq" qəzetinin baş redaktoru Maksim Vasyukov və başqaları iştirak edirdilər.
Qeyd edək ki, Leninqrad universitetinin Şərq fakültəsini bitirən Andrey Konstantinov bir müddət "Komsomolskaya pravda" qəzetinin Leninqrad bölgəsi üzrə müxbiri olub. O, 1996-cı ildə Jurnalist Tədqiqatları Agentliyini təsis edib və hazırda bu qurumda 140 əməkdaş çalışır. A.Konstantinovun qələmə aldığı "Bandit Peterburqu", "Sizif əməyi", "Qoblinlər", "Jurnalist" və sair əsərlər əsasında populyar kino-filmlər çəkilib.
Təəssüratlarını bölüşən A.Konstantinov ilk dəfə olduğu Bakıdan heyran qaldığını və iştirakçısı olduğu forumun olduqca yüksək səviyyədə təşkil edildiyini vurğulamışdır. O qeyd etmişdir ki, bu qəbildən olan tədbirlər iki cəhətdən önəmlidir. Birincisi, burada xalqlar, mədəniyyətlərarası əlaqələr qurulur, ideyalar mübadiləsi və dialoq təşəkkül tapır. İkincisi, təşkilatçı ölkə imicini formalaşdırır, mədəni səviyyəsini, potensialını nümayiş etdirir. Bu baxımdan Bakı Beynəlxalq Humanitar Forumunu fövqəladə dərəcədə mötəbər və uğurlu hesab edirəm və o, qarşısına qoyduğu məqsədlərə nail olmuşdur.
Sonra Andrey Konstantinov jurnalistlərin çoxsaylı suallarını cavablandırmışdır.

Ayaz HƏMİDOĞLU, "Xalq qəzeti"