İkinci dəfədir ki, Azərbaycanda keçirilən Beynəlxalq Humanitar Forumun miqyası, əhəmiyyəti və dünya ictimaiyyəti tərəfindən qəbul edilməsi çox önəmli bir məsələdir. Keçən ildən fərqli olaraq iştirakçıların sayı artmışdır. Bu özlüyündə Foruma olan marağın artması deməkdir. 
Bu sözləri Bakı Dövlət Universitetinin rektoru, Milli Məclisin deputatı, akademik Abel Məhərrəmov demişdir.
Akademik A.Məhərrəmov bildirmişdir ki, oktyabrın 4-də Forumun plenar iclası oldu. Tarixi çıxışları dinlədik. Azərbaycan Prezidenti İlham Əliyevin nitqi bizə Forumun strategiyası, taktikası, gələcəyi haqqında geniş və önəmli məlumat verdi. Sabiq dövlət başçıları, Nobel mükafatı laureatları çıxış etdilər. Bütün bunlar onu göstərir ki, Azərbaycan artıq özünü sadəcə bir humanitar Forum təşkilatçısı kimi yox, beynəlxalq müstəvidə humanitar düşüncələri önə çəkən bir ölkə kimi təsdiqləyib. Hətta orada belə bir fikir səsləndi ki, Azərbaycan gələcəyə baxan humanitar düşüncə mərkəzinə çevrilsin. Bu, çox vacibdir. Bu düşüncəni "XXI əsrdə qloballaşma proseslərinə yeni metodoloji yanaşmalar" mövzusunda "dəyirmi masa"da da müzakirə etdik. Yəni, artıq dünya Azərbaycanı nəinki iqtisadi, eyni zamanda, humanitar baxımdan gələcəyə baxış müstəvisində bəşəri dəyərləri çox inkişaf etmiş bir ölkə kimi qəbul edir. Ümumiyyətlə Bakı Beynəlxalq Humanitar Forumunun böyük əhəmiyyəti vardır.

AzərTAc