Dağlıq Qarabağ münaqişəsinin tənzimlənməsi ilə əlaqədar Azərbaycan və Ermənistan prezidentlərinin görüşü hələlik planlaşdırılmamışdır. 
ATƏT-in Minsk qrupunun rusiyalı həmsədri İqor Popov bu barədə jurnalistlərə iyulun 10-da məlumat verərək qeyd etmişdir ki, həmsədrlərin regiona səfəri başa çatandan sonra hər iki ölkənin xarici işlər nazirləri ilə təkrar görüş planlaşdırılır.
İ.Popov demişdir ki, regiona səfər dövründə gələcək perspektivlərlə əlaqədar planlar müzakirə ediləcəkdir. Rusiyalı həmsədr demişdir: "Yaxın perspektivdə, ola bilsin ki, yay tətili başa çatandan sonra biz Azərbaycan və Ermənistan XİN başçıları ilə əvvəlcə ayrı-ayrılıqda görüşəcəyik, sonra isə birgə görüş təşkil etməyi planlaşdırırıq. Bu səbəbdən, prezidentlərin görüşü barədə hələ söhbət getmir".
Rusiyalı həmsədr vurğulamışdır ki, Bakıda Prezident İlham Əliyev və Azərbaycanın xarici işlər naziri ilə görüşlərdə qoşunların təmas xəttində baş vermiş son hadisələr müzakirə edilmişdir. O bildirmişdir ki, eyni məsələni Yerevanda da müzakirə etmək niyyətindədir.
Minsk qrupunun amerikalı həmsədri Robert Bradtke isə jurnalistlərə bildirmişdir ki, Azərbaycan Prezidenti ilə görüşü çox konstruktiv olmuşdur. O qeyd etmişdir ki, sabah həmsədrlər Azərbaycan tərəfdən qoşunların təmas xəttini keçəcək və Qarabağa yola düşəcəklər. Bradtke demişdir: "Qoşunların təmas xəttindən keçmə praktikasını davam etdirmək çox vacibdir. Bu, atəşkəs rejimini qoruyub saxlamağın zəruri olduğunu göstərir".