Dövlət Gömrük Komitəsi (DGK) Sadıxlı gömrük-keçid məntəqəsinə beynəlxalq status almaq niyyətindədir.
Bu barədə DGK-nin sədri Aydın Əliyev jurnalistlərə açıqlamasında bildirmişdir.
Komitə sədri demişdir ki, bununla bağlı Gürcüstanın Azərbaycandakı səfiri ilə müəyyən məsələlər müzakirə edilmişdir. Hazırda Gürcüstan-Azərbaycan sərhədinin qərb istiqamətində beynəlxalq statusa malik iki keçid məntəqəsi mövcuddur. Bunlar Sınıq Körpü və dəmir yolunda Böyük Kəsik keçid məntəqəsidir. Yüklərin, o cümlədən tranzit daşımaların artması nəzərə alınaraq Sadıxlı adlandırılan keçid məntəqəsində müəyyən abadlaşdırma və təşkilatı işlər aparıldıqdan sonra həmin məntəqəyə beynəlxalq status verilməsi üçün məsələ qaldırılacaqdır.
A.Əliyev vurğulamışdır ki, bu məntəqəyə beynəlxalq status verilməsi yüklərin sərhəddən tez keçməsinə, həmçinin iki dövlət arasında ticarət dövriyyəsinin artmasına səbəb olacaqdır.