"Eurovision" mahnı müsabiqəsinin çox vacib, önəmli, spesifik tərəflərindən biri də layihədə çoxlu sayda ölkələrin iştirakıdır. Layihə çoxlu xalqların, mədəniyyətlərin bir araya gəldiyi bir layihədir.
Bu sözləri müsahibəsində "Eurovision-2012" mahnı müsabiqəsinin ictimaiyyətlə əlaqələr və kommunikasiya rəhbəri Tahir Məmmədov demişdir.
Bildirilmişdir ki, "Eurovision-2012" mahnı müsabiqəsində iştirak edəcək 42 dövlətin nümayəndələrinin qarşılanması, yerləşdirilməsi ilə bağlı artıq bütün qərarlar verilmişdir və bu sahələrdə işlər plan üzrə gedir. Artıq inamla deyə bilərik ki, mərhələnin böyük bir hissəsi arxada qalmışdır. May ayının birinci yarısından etibarən onlar Bakıya gəlməyə başlayacaqlar.
T.Məmmədov nümayəndələrin hər birinin ölkəmizə səfərdən və Bakıda keçiriləcək mahnı müsabiqəsindən razı qalacağına inamını ifadə etmişdir. Nəzərə çatdırılmışdır ki, nümayəndə heyətləri artıq qalacaqları otelləri də müəyyənləşdirmişlər. Təklif olunmuş şəhərimizdəki çoxsaylı otellər onlara çox sərbəst və geniş seçim imkanı yaratmışdır. Nümayəndələr öz arzularına, standartlarına uyğun otellər seçmişlər. Hər bir nümayəndə heyətindən aldığımız rəy bundan ibarətdir ki, onlar seçdikləri yerdən, oteldən, Azərbaycan paytaxtındakı ab-havadan çox razıdırlar.
"Eurovision-2012" mahnı müsabiqəsinin ictimaiyyətlə əlaqələr və kommunikasiya rəhbəri bu rəyi nümayəndə heyətləri rəhbərlərinin mart ayında keçirilmiş toplantısında bildirdiklərini diqqətə çatdırmışdır. İnanırıq ki, onların hər biri Bakıda özünü öz evindəki kimi hiss edəcəkdir.

AzərTAc