Azərbaycanın G-20 sammitində iştirakı ölkənin beynəlxalq arenada uğurunun nəticəsidir. Bu barədə cümə günü Trend-ə Qərb Universitetinin professoru Fikrət Sadıxov açıqlama vermişdir:
-"Azərbaycanın G-20 sammitində iştirakı, heç şübhəsiz ki, ölkənin beynəlxalq arenada son illərdə qazandığı uğurunun, qabaqcıl dövlətlərlə qurduğu münasibətlərin, son illər həyata keçirdiyi xarici siyasət kursunun - təmkinli, balanslaşdırılmış və tarazlaşdırılmış siyasətin nəticəsidir".
Politoloqun fikrincə, Azərbaycanın belə nüfuzlu foruma dəvəti həm də ölkənin Avropanın qabaqcıl dövlətlərinin enerji təhlükəsizliyində oynadığı vacib rolunun etirafıdır.
Azərbaycan faktiki olaraq vacib regional oyunçuya çevrilmişdir.
"Düşünürəm ki, bu, həm Azərbaycanın real imkanlarının, həm də onun gələcəkdə aparacağı kursun, bütün siyasi fəaliyyətin qurulduğu prinsiplərin, ölkənin qabaqcıl dövlətlərlə qarşılıqlı münasibətlərdə rəhbər tutduğu prioritetlərin real qiymətidir. Bütün bunlar ölkəmizin dünya ictimaiyyətinin gözündə əhəmiyyətini və dünya siyasi məkanında çəkisini artırır".
Qeyd edək ki, G-20-yə üzv ölkələrlə yanaşı, iclasa 10 ölkə və bir təşkilat dəvət edilib: Afrika İttifaqı, Əlcəzair, Avstriya, Azərbaycan, Kamboca, Çili, Kolumbiya, Norveç, Sinqapur, İspaniya və BƏƏ.