Azərbaycanın Fövqəladə Hallar Nazirliyi (FHN) sovet dövründə və ondan əvvəlki illərdə tikilmiş binalarda yoxlama aparır.
"APA-ECONOMICS"in məlumatına görə, jurnalistlərə açıqlamasında fövqəladə hallar naziri Kəmaləddin Heydərov bildirmişdir ki, bu araşdırmalar Bakının müxtəlif ərazilərində, o cümlədən mikrorayonlarda aparılır. Tarixi binaların isə hamısı araşdırılır. Araşdırmalara bu yaxınlarda Türkiyədə baş verən və böyük dağıntılara səbəb olmuş zəlzələdən sonra başlanılmışdır: "Araşdırmalar göstərir ki, paytaxtdakı bəzi binaların konstruksiyaları zəifdir, bu, daha çox "Xruşşovka" adlanan binalara aiddir".
Nazir demişdir ki, FHN bu araşdırmaları başa çatdırdıqdan sonra yaxın vaxtlarda hökumət qarşısında həmin binalarda bərpa işlərinin aparılması və ya həmin binaların sökülərək yerində yeni binaların tikilməsi təklifi ilə çıxış edəcək: "Ümid edirik ki, bu məsələ yaxın vaxtlarda rəsmiləşəcək".
Nazirin sözlərinə görə, Bakıdakı köhnə binaların bir hissəsi sökülərək yenisi ilə əvəz olunması istisna edilmir.