Azərbaycan Prezidenti Administrasiyası İctimai-siyasi məsələlər şöbəsinin müdiri Əli Həsənovun başçılıq etdiyi nümayəndə heyəti sabah İrana səfər edəcək.
APA-nın məlumatına görə, bu barədə məlumat verən Əli Həsənovun sözlərinə görə, səfər İran hökumətinin təşəbbüsü ilə gerçəkləşir. Səfər dəvəti çoxdan edilsə də, vaxtın təyini ilə bağlı problemlərə görə dekabra salınmışdır.
Görüşlərdə iki dövlət arasında mövcud informasiya, təbliğat, televiziya yayımları, ictimai institutların ölkədaxili proseslərə münasibətləri, açıqlamalar, ayrı-ayrı bəyanatlar və bu məsələlərdən irəli gələn məsələlər müzakirə olunacaq: "Azərbaycan həmişə İranla dost və qonşu münasibəti saxlamağa cəhd göstərmişdir, həmin siyasəti bu gün də saxlamağa çalışır. İran da həmişə münasibətləri yaxşı müstəvidə saxlayır. Təəssüflər olsun ki, son vaxtlar həm İran, həm də Azərbaycanda bəzi dairələr bilərəkdən, yaxud bilməyərəkdən iki qonşu ölkə arasında münasibətlərə ictimai-siyasi, mətbuat, teleradio, təbliğat müstəvisində xələl gətirə bilən müəyyən tədbirlər həyata keçirirlər. Müəyyən məlumatlar, hərəkətlər müşahidə olunur. Səfərin əsas məqsədi bütün bunlara son qoymaqdır".
Əli Həsənov səfər çərçivəsində İran telekanallarının Azərbaycanın efir məkanına müdaxiləsi, həmçinin bəzi İran telekanalları tərəfindən ölkəmizin daxili işlərinə qarışma cəhdlərinin qarşısının alınması, antiazərbaycan, İrandakı ayrı-ayrı dairələrin təhrikedici, Azərbaycandakı dini vəziyyətlə bağlı çıxışlarına son qoyulması məsələlərinin xüsusi yer tutacağını qeyd etmişdir.