Azərbaycan ərazilərini işğal edib, müəyyən məqsədlərinə nail olandan sonra Ermənistanın həm rəsmi, həm də qeyri-rəsmi strukturları danışıqlardan qaçmağa, bununla mövcud reallığı uzatmağa çalışırlar.
Bu sözləri Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov Dağlıq Qarabağın erməni icmasının nümayəndələrinin noyabrın 28-də Berlində keçirilən görüşünə qatılmamasına münasibət bildirərkən demişdir.
Münasibətlərin tənzimlənməsindəki əsas istiqamətlərdən birinin icmalararası danışıqların olduğunu deyən Əli Həsənov vurğulamışdır ki, rəsmi Bakı bu məsələyə önəm verir. Azərbaycanlı icması danışıqlarda iştirak etməyə həmişə hazır olmuşdur. Ermənilərin danışıqlara hansı səbəblərdən gəlmədiyini araşdırmaq lazımdır.
Şöbə müdiri bildirmişdir ki, ermənilər bu addımları ilə dünya və Azərbaycan ictimaiyyətini reallıqla barışdırmağa çalışırlar. Bu da onu göstərir ki, ermənilər işğalçı siyasətlərinə son qoymaq istəmir, danışıqlardan da prosesin uzadılması məqsədilə istifadə edirlər. Azərbaycan dəfələrlə bəyan etmişdir ki, bu siyasətin sonu yoxdur və hərbi qarşıdurmaya gətirib çıxara bilər.