Azərbaycanın BMT Təhlükəsizlik Şurasının qeyri-daimi üzvü seçilməsi ölkə üçün çox şey verəcək. Lent.az-ın məlumatına görə, bu barədə jurnalistlərə millət vəkili Qənirə Paşayeva bildirib.
Onun sözlərinə görə, üzvlük Azərbaycanın Ermənistan tərəfindən pozulmuş ərazi bütövlüyü məsələsini birbaşa BMT Təhlükəsizlik Şurasının gündəliyinə daxil etmək hüququ verir. "Azərbaycan BMT Təhlükəsizlik Şurasının qəbul etdiyi qətnamələrin indiyə qədər yerinə yetirilməməsi məsələsini birbaşa Şuranın gündəliyinə çıxara, Şuranın diqqətini bu məsələyə daha çox cəlb edə bilər", - deyə Qənirə Paşayeva vurğulayıb.
Deputat bildirib ki, Azərbaycan BMT Təhlükəsizlik Şurasının qeyri-daimi üzvlüyünə Macarıstan və Sloveniya ilə mübarizədə böyük üstünlüklə əldə edilən uğurla qəbul edilib, Azərbaycan Şərqi Avropanı BMT TŞ-də təmsil etmək hüququnu qazanıb.
"Şuraya üzv olmaq dünyadakı sülh və təhlükəsizlik məsələlərində Azərbaycana səs hüququ verir və ölkə bu kimi məsələlərdə daha geniş, təsirli iştirak etmək imkanı qazanacaq. Bu, diplomatik qələbədir. Müstəqilliyini cəmi 20 il bundan qabaq qazanan ölkə Şərqi Avropanı təmsil etmək hüququnu qazanıb", - deyə o əlavə edib.