Gələn ilin mayına qədər Həştərxan şəhərində Azərbaycan-Rusiya Dostluq körpüsünün inşası başa çatacaqdır. AzərTAc xəbər verir ki, bu sözləri jurnalistlərə müsahibəsində Həştərxanda Heydər Əliyev adına orta məktəbin açılışında iştirak edən nümayəndə heyətinin rəhbəri Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov bildirmişdir. 
Ə.Həsənov demişdir ki, Həştərxan vilayətində Azərbaycanla bağlı çoxlu sayda tədbirlərin həyata keçməsi Həştərxan rəhbərliyinin Azərbaycan xalqına, ümummilli lider Heydər Əliyevin xatirəsinə, Prezident İlham Əliyevə olan dərin hörmətin göstəricisidir. "Bu münasibətləri qorumaq və inkişaf etdirmək üçün Azərbaycan dövləti səylərini əsirgəmir və buna böyük önəm verir. Bu ilin sentyabrında Həştərxan vilayətinin qubernatoru Aleksandr Jilkinin Azərbaycana səfəri çərçivəsində imzalanan ikitərəfli razılaşmalar bu əlaqələri daha yüksək səviyyəyə qaldırır" - deyə Ə.Həsənov vurğulamışdır.
Şöbə müdiri bu əlaqələrin yüksələn xətlə inkişaf etməsində Azərbaycan və Rusiyanın dövlət başçıları İlham Əliyev və Dmitri Medvedevin xidmətlərini önə çəkmişdir. "Dövlətlərimizin başçılarının ümumən ölkə səviyyəsində müəyyən etdiyi strateji münasibətlər, eyni zamanda, ayrı-ayrı regionlar arasında da həyata keçirilir. Bu münasibətlər gələcəkdə də Azərbaycan və Rusiya xalqları, dövlət və qeyri-dövlət strukturları arasında əlaqələrin inkişafında önəmli rol oynayacaq" - deyə Ə.Həsənov bildirmişdir.
Ə.Həsənov Həştərxan vilayətində Azərbaycan diasporunun rolunu yüksək qiymətləndirərək azərbaycanlıların vilayətdə ən şərəfli vətəndaşlar sırasında olduğunu qeyd etmişdir. "Həştərxanın mərkəzində ümummilli lider Heydər Əliyevin adına park və yeni açılan bu orta məktəb daim Rusiyanın bu regionunda Azərbaycanın milli dəyərlərinin təmsilçisi olacaqdır" - deyə Ə.Həsənov söyləmişdir.