Bakı mənim üçün dünyanın ən gözəl şəhərlərindən biridir. Burada görülən işlər, baş verən dəyişikliklər hazırda dünyanın heç bir yerində mövcud deyildir. Şəhər sanki yenidən yaradılır, hər şey günbəgün gözəlləşir, insanların asudə vaxtlarını səmərəli keçirmələri üçün yeni-yeni parklar salınır. İnkişafla bağlı hər nə fikirləşirsənsə, onu Bakıda real görə bilərsən.
Bu sözləri Bakıda Azərbaycanın dövlət müstəqilliyinin bərpasının iyirminci ildönümünə həsr olunmuş Beynəlxalq bayram tədbirində iştirak edən amerikalı alim, Nobel mükafatı laureatı Edvard Preskot demişdir.
Alim bildirmişdir ki, son illər mühüm beynəlxalq tədbirlərə ev sahibliyi edən Azərbaycan aktual problemləri birlikdə müzakirə etmək üçün müxtəlif ölkələrin və sivilizasiyaların nümayəndələrini birləşdirən, onları bir yerə toplayan körpü rolunu oynayır. Bu görüşlər bizə imkan verir ki, dünyada baş verən dəyişiklikləri təhlil edək, bir-birimizi yaxından tanıyaq, daha gözəl işlər görmək üçün səylərimizi birləşdirək.
Edvard Preskot demişdir: "20 illik müstəqillik tarixi Azərbaycan xalqına çox böyük inkişaf bəxş etmişdir. Bu tərəqqinin kökündə sözsüz ki, dövlətə və onun rəhbərinə xalq sevgisi durur. İnanıram ki, bu sevgi Azərbaycana daha böyük inkişaf bəxş edəcəkdir".