Rusiya Cənubi Qafqazda militarist konsepsiyadan iqtisadi iştiraka keçməlidir.Bunu xarici işlər nazirinin müavini, Azərbaycan Prezidentinin Ermənistan-Azərbaycan, Dağlıq Qarabağ münaqişəsi üzrə şəxsi nümayəndəsi Araz Əzimov "Exo Moskvı" radiostansiyasına müsahibəsində bildirmişdir.
"Təəssüf ki, Rusiya Ermənistan ərazisində hərbi qüvvələri saxlamağı vacib hesab edir. Biz onun Cənubi Qafqazda belə bir militarist konsepsiya ilə iştirakı üçün çox az əsas görürük. Tankları tankerlərə, yəni iştirakın hərbi formasını iqtisadi əsasa dəyişməyin vaxtı gəlib çatmışdır. Ermənistanı danışıqlarda səsləndirilən konstruktiv təklifləri qəbul etməyə inandırmaq Rusiyanın da marağındadır" - deyə A.Əzimov qeyd etmişdir. O, rəsmi Bakının Rusiya hərbçilərinin Ermənistanda olmasından narahat olduğunu da bildirmişdir.
A.Əzimov "Exo Moskvı" radiostansiyasının baş redaktorunun müavini Sergey Buntmanın Azərbaycana gəlməsi üçün icazənin Ermənistan-Azərbaycan, Dağlıq Qarabağ münaqişəsi nizamlandıqdan sonra veriləcəyini söyləmişdir.
Xatırladaq ki, S.Buntman Dağlıq Qarabağa səfər etdikdən və separatçı rejimin bir neçə rəhbərindən müsahibə aldıqdan sonra onun adı ölkəmizə gəlməsi qadağan olunmuş şəxslərin siyahısına daxil edilmişdir.
AzərTAc{nl}