"Bu qurultay dünya azərbaycanlılarının həyatında yeni mərhələnin başlanğıcı olacaq"

Bu fikri Prezident Administrasiyası İctimai-siyasi məsələlər şöbəsinin müdiri Əli Həsənov iyulun 5-də Bakıda işinə başlayan Dünya Azərbaycanlılarının III Qurultayı ilə bağlı APA-ya açıqlamasında demişdir.
Ə. Həsənov əvvəlki qurultaylarda dünyada yaşayan azərbaycanlıların qarşısında həmrəyliyin, birliyin möhkəmləndirilməsi, təşkilatlanmaq, öz ölkələrinin ictimai və siyasi həyatında fəal qüvvəyə çevrilmək, Azərbaycan dövlətçiliyinin əlavə xarici resursu kimi dünyada Azərbaycan dövlətçiliyini, millətini təbliğ etmək kimi məsələlər qoyulduğunu bildirib: "2001-ci ildə bu istiqamətdə atılan mühüm addım kimi Azərbaycanda Diasporla İş üzrə Dövlət Komitəsi yaradılıb. Komitə dünya azərbaycanlılarının təşkilatlanması, vahid bir ideya ətrafında birləşməsi, onların öz aralarında və Azərbaycan dövləti ilə əlaqələrinin qurulması istiqamətində mühüm işlər görmüşdür".
Ötən müddətdə Dünya Azərbaycanlılarının Xartiyasının qəbul olunduğunu xatırladan Ə. Həsənov orada dünya azərbaycanlılarının fəaliyyətinin əsas strateji vəzifələrinin müəyyən olunduğunu bildirmişdir: "Bunun ətrafında hesabatlar dinləniləcək. Hesabatlarda əsasən bu günə kimə nəyə nail olunduğu, bundan sonra bizi hansı işlərin gözlədiyi qeyd olunacaq. Dünya azərbaycanlılarının qarşısında hansı ideyaların durduğu əsas müzakirə mövzusu olacaq".