"Hərbi parad çox uğurlu keçdi və biz bir tərəfdaş olaraq bundan qürur duyuruq". Bunu APA-ya hərbi paradı şərh edən CAR-ın "Paramount Group" şirkətinin prezidenti Ayvor İçikovitz (Ivor Ichikowitz) deyib.
Rəsmi Bakı ilə əməkdaşlığın uğurlu keçdiyini deyən şirkət rəhbərinin sözlərinə görə, Azərbaycanla reallaşdırdıqları layihə çox uğurlu olub: "Layihənin gələcək bir neçə ildə daha da genişlənməsi üçün potensial var və biz bu barədə düşünürük. Parad başqa tədbirlərlə müqayisədə çox simvolikdir. Biz Müdafiə Sənayəsi Nazirliyi ilə birgə əldə etdiyimiz nailiyyətləri, istehsal etdiyimiz texnikaları nümayiş etdirməyə imkan qazandıq".
A. İçikovitz bildirib ki, "Paramount Group" Azərbaycan hərbi sənaye kompleksində iştirak edən bir şirkət olaraq, prezident İlham Əliyevin müdafiə sənayesi yaratmaq və inkişaf etdirmək fikirlərini bölüşür: "Biz bu ideyalara və prezidentin missiyasına dəstək verməyə hazırıq. Tərəfdaşımız olan Müdafiə Sənayesi Nazirliyi gənc qurum olmasına baxmayaraq, paradda göründüyü kimi, böyük nailiyyətlərə imza atıb. İnanırıq ki, bu maşınların istehsalı layihəsi Azərbaycanda bütöv sənaye kompleksinin yaranmasına imkan verəcək. Bizim məhsullar Azərbaycandan digər ölkələrə ixrac olunacaq".
Qeyd edək ki, paradda MSN-in "Paramount Group"la müştərək istehsal etdiyi, silahlandırılmış 14 ədəd minaya qarşı qorumalı nəqliyyat vasitəsi iştirak edib. Bunlardan 7-si "Matador", 7-si isə "Marauder" tipli nəqliyyat vasitələri olub. Əsasən 14,5 və 12,7 çaplı pulemyotlarla təchiz olunan nəqliyyat vasitələri "V" formalı şassiyə malikdir. Onlar tank əleyhinə minaların partlaması halında belə şəxsi heyəti qəlpələrdən və partlayışın təsirlərindən mühafizə edir. "Matador" STANAG 4569 Level 4a və STANAG 4569 Level 4b, "Marauder" isə STANAG 4569 Level 3a və STANAG 4569 Level 3b standartlarına uyğundur.