AMEA-nın Gəncə bölməsi, yəni, mənim iş yerim Gəncə Şəhər İcra Hakimiyyətinin inzibati binasının qarşısındadır. İyulun 10-da axşam saat 20 radələrində bir qrup dini radikal heç bir tələb irəli sürmədən asayişi qoruyan polislərə hücum edib, soyuq silahlarla və kəsici-deşici alətlərlə iki polis əməkdaşını qətlə yetirib. Sözsüz ki, bu hərəkət dövlətə və dövlətçiliyə qarşı böyük bir qəsd və qanlı cinayətdir. Gəncə sakinlərinin bu işlərin heç birindən xəbərləri yox idi. Bu qanlı terror bir andaca həyata keçirildi.

 

 Gəncənin bu meydanı şəhər sakinləri üçün istirahət yeridir. Burada fəvvarələr, oturacaqlar və insanların istirahəti üçün hər cür şərait var. Bu hadisə də elə insanlar parkda istirahət edən vaxt qəfildən baş verdi. Azərbaycanın hüquq-mühafizə orqanlarının əməkdaşları, polislərimiz bu hadisədə böyük rəşadət göstərdilər. Qısa vaxtda – 15-20 dəqiqə ərzində iğtişaşın qarşısı alındı. Şəhərdə dünən axşamdan asayiş tam bərpa olundu. 

Gəncənin ictimai həyatı artıq əvvəlki axarında davam edir. İnsanlar yenə də gündəlik işləri ilə məşğuldurlar. 

Biz, şəhər ziyalıları  Gəncədə son günlərdə baş verən terror hadisəsini və qanlı iğtişaşı böyük nifrətlə qarşılayırıq və bu cür hadisələri qınayırıq. Bu cür hadisələrin şəhər sakinləri ilə heç bir əlaqəsi yoxdur. Əminik ki,  cinayətkarlar tezliklə cəzasını alacaqlar, onların arxasında duran qüvvələr isə ifşa olunacaqlar. Gəncəlilər heç zaman razı ola bilməzlər ki, Cənubu Qafqazın ən sabit və sürətlə inkişaf edən ölkəsi Yaxın və Orta Şərqin, ərəb və Afrika ölkələrinin vəziyyətinə düşsün. Azərbaycan hüquqi dövlətdir. Bura naməlum güclərin xaos poliqonu deyil. Azərbaycanın ikinci, özü də öz gözəlliyi ilə indi hamının diqqətini cəlb edən bir şəhərdə  din pərdəsi altında gizlənib iğtişaşlar törətməyə cəhd edən cinayətkarların hamısı tezliklə ifşa olunacaqlar. Dünənki hadisə bir daha göstərdi ki, bunlar qabaqcadan planlaşdırılıbmış. Yaxşı ki, müdrik Gəncə əhalisi bunu başa düşdü və onların qanunsuz çağırışlarına qoşulmadı. Gəncəlilər dövləti və dövlətçiliyi daim qoruyub, bundan sonra da qoruyacaqlar. 

Fuad ƏLİYEV,  

AMEA-nın Gəncə bölməsinin 

akademik katibi, professor