Bakı Ürək Mərkəzində ürək-damar cərrahı, tibb üzrə fəlsəfə doktoru Rəşad Mahmudovun rəhbərliyi altında ürək-damar cərrahı Natiq Mirzəyev tərəfindən çəkisi 2,5 kq olan körpədə uğurlu əməliyyat icra olunub.

Xəstə 7 aylıq doğulub və 2 ay ərzində təkrarlanan pnevmoniyaya görə xəstəxanada müalicə alıb. Bakı Ürək Mərkəzinə müalicə ilə keçməyən ciddi təngənəfəslik, ürək çatışmazlığı ilə müraciət edilib. Körpəni təcili əməliyyat ediblər. Hazırda xəstənin ümumi vəziyyəti stabildir.

Qeyd edək ki, son iki həftə ərzində Bakı Ürək Mərkəzində çəkisi 4 kq-dan az olan yenidoğulmuş azçəkili üç körpə üzərində uğurlu ürək əməliyyatları tətbiq olunub.

Ürək qüsurlu yeni doğulmuşların sağlamlığının qorunması istiqamətində dövlətimiz tərəfindən əsaslı tədbirlərin həyata keçirildiyini vurğulayan R.Mahmudov azçəkili körpələr üzərində də belə mürəkkəb ürək əməliyyatlarının aparılmasını ölkə səhiyyəsinin uğuru hesab etdiyini bildirib.

Z.BƏŞİRQIZI,
“Xalq qəzeti”